Gula 4
Nakasabot dayon si Rey Corpuz sa summary sa mga panghitabo nga gisaysay ni Althea kaniya. Ang pagkahilambigit sa VPL sa dakong anomaliya sa pagpamaligya og peke nga mga tambal makadaot sa reputasyon sa maong buhatan. Labaw sa tanan, modako ang alkanse sa VPL tungod kay gipasirad-an man kini sa korte.
"Unsay gusto mo nga akong buhaton?" Gisukna ni Rey si Althea.
"Gusto ko nga mag-conduct ka og linain nga imbestigasyon," ni Althea pa, "aron masayran kun kinsa ang responsable sa paggamit sa ngalan sa VPL sa pagpamaligya og peke nga mga tambal. Kini ang hinungdan nga gikuha namo ang imong serbisyo. Nakigsabot na ko sa imong ahensiya mahitungod niining maong gimbuhaton."
"Dili sayon kining maong gimbuhaton, Althea."
"Nasayod ko. Pero misalig ko sa imong abilidad sa paniktik. Ug nasayod ko nga dili ko nimo balibaran. Dili ba, Rey?"
Wala lang tuyoa nagkatagbo ang mga tinan-awan nila ni Rey ug Althea. Taudtaod gayod ang ilang pagtinutokay. Morag nagsultihanay ang ilang mata. Ug sila ray nakasabot sa kahulogan sa kinidlap nga milagtiw sa ilang mga tinan-awan.
Unya nag-akob ang ilang mga ngabil. Kadali rang nanginit ang ilang kalawasan. Ug sa laing higayon, gitambayayongan nila pagkatkat ang kinatumyan sa ikapitong langit. Nagpabatang si Althea sa ilawom ni Rey. Ug nakab-ot gayod nila ang katagbawan sa gisaw-an nila pagtagay nga dugos sa lawasnong himaya.
"Paninguhaon ko nga masulbad gilayon kining problema nga imong gipaimbestigahan nako," nagkanayon si Rey human sa ikaduha nilang lovemaking session.
"Salamat," ni Althea pa. "Nagpa-reserve na kog lawak sa Royal Suite ning hotel alang nimo."
"U-unsa?"
"Ayaw kabalaka. Akoy bahala sa mga galastohan. Gusto kong anhi ka mag-istar ning maong hotel aron mas sayon alang nako ang pagpakigkita nimo."
"Okey. Ikaw ang mag-igo."
Ug sa laing higayon, gitagay nila ang lawasnong kalipay. -- Sumpayan pa