Gula 2
Daw nahaugbok si Rey sa iyang gibarogan. Nasurpresa siya sa iyang pagkakita kang Althea. Mipahiyom si Althea kaniya. Misamot kini ka guwapa sa iyang panan-aw.
"Ngano bang mora ka man og gilansang diha?" Sukit ni Althea. "I-lock kanang pultahan ug duol diri sa akong nahimutangan."
Giserad-an ni Rey ang pultahan. Unya mihinay siyag duol kang Althea nga naglingkod sa ngilit sa mahunolhunol nga katre.
"Ikaw ba diay ang giingon sa akong labaw sa 9mm nga nagkinahanglan sa akong serbisyo?" Nangutana dayon si Rey.
"Oo," tubag ni Althea. "Wa ka tingali magdahom, no, nga magkita kita pag-usab? Pero...gamay ra gyud ang kalibotan."
"Unsay akong ikaalagad kanimo?"
"Unya na nato hisgoti ang bahin sa problema nga akong patabangan nimo."
"A-Althea," mikurog ang tingog ni Rey dihang gihapuhap ni Althea ang iyang dughan ug gitangtang ang butones sa iyang gisul-ob nga long-sleeved.
"Sumpayan nato ang naputol nga panahon, Rey," maguwang sa hagawhaw ang tingog ni Althea nga mihapuhap sa mga balhibo sa iyang dughan.
Nakasabot dayon si Rey sa gipamulong ni Althea. Daghan na siyag kasinatian sa babaye mao nga kadali ra siyang makatugkad og romantikong mga pasumbingay.
Dihadiha giukoban niya ang mga ngabil ni Althea. Lihokan usab ang iyang mga kamot nga nagpanghiram sa pribadong mga bahin sa lawas sa babaye. Paglabay sa pipila ka gutling, pareho na silang walay mga sapot. Gipahigda niya si Althea sa kama ug giangkon niya ang pagka babaye niini.
Mitiurok si Rey sa kalalim dihang nagdungan sila pagsangko sa kinapungkayan sa himaya. Si Althea mikumpayot og maayo kaniya aron dili niya mabiyaan paingon sa ikapitong langit. Pareho silang mihangos sa kakutas.
"Duna koy paimbestigahan nimo, Rey," ni Althea human sa ilang kombate.
"Unsa man kana?" Misukna si Rey.
"Bahin sa Visayas Pacific Laboratories." -- Sumpayan pa