Tysan mayoral bet umalma sa akusa ng PNP

Ania ra siya karon sa akong duol apan nahisama siya sa usa  ka layong bukid nga maabot lamang sa akong panan-aw. Ania ra siya sa akong tupad apan ingon sa dili siya maabot kon kab-uton sa akong mga kamot. Sa laktod, duol siya apan layo kanako. Ug layo usab siya apan duol kanako.

Suod nakong higala si Gabriella. Una ko siyang gikaila sa akong pagtambong sa birthday party sa akong higala nga si Vito. Sa una pa lang nakong pagkakita ni Gabriella,nakadayeg na ako sa nabatonan niyang katahom. Ug kadali ra kaming nagkasuod.

"Hain man diay ang imong uyab, Ken?" ni Gabriella pa. "Nganong wa man nimo siya dad-a aron sab malingaw siya."

"Wa koy uyab, Gabriella," hinay ang panuni sa akong tingog.

"Kaha?" ni Gabriella pa nga namatikdan ko nga migilak ang iyang mga mata. "O imo lang siyang gilimod o kaha gikauwaw?"

"Nagsulti ako sa tinuod. Sa una, aduna akoy hinigugma. Apan wala na siya karon."

Ug gisultihan ko siya sa kaagi namo ni Erna, ang kanhi nakong hinigugma. Maluibon si Erna nga pagka-babaye. Nakigminyo siya sa penpal niyang Amerikano dungan ang pagsalindot niya sa among mga panumpa.

"Sakit diay kaayo ang imong  kasinatian, Ken," nagkanayon si Gabriella nga ingon sa mibatig kaluoy kanako.

"Mao kanay hinungdan nga ingon sa mitagam na ako sa gugma," matud ko. "Nanumpa ako nga dili na gayod makigrelasyon og babaye."

"Ayaw serad-i ang pultahan sa imong kasingkasing, Ken," ni Gabriella pa. "Dili baya tanang babaye sama'g hunahuna sa imong kanhing hinigugma."

Unya gisuginlan usab ako ni Gabriella sa masakit niyang kasinatian sa gugma. May hinigugma diay usab siya kaniadto apan demalas ang ilang gugma kay napikot kini sa laing babaye.

Sukad niadto kanunay na kaming magkuyog sa pagpanuroy. Ang Ayala ug SM maoy kanunay namong suroyan. Malipayon kami. Sila si Vito ug Elfie natahap gani nga may relasyon na kami. Apan wala. Kutob lang kami sa panaghigala.

Apan miabot gyod ang higayon nga na-develop ko sa paghigugma kang Gabriella. Gitago lang nako ang maong pagbati tungod sa kaikog. Nahadlok ko nga maguba ang among panaghigalaay kun mangahas ako pagpadayag sa akong gibati ngadto kaniya. Dinhi magsugod nga sa higayong magkuyog kami, bation ko nga bisan duol siya kanako apan sama siya sa bukid sa halayo nga maabot lamang sa akong panan-aw, dili nako makab-ot ug maangkon.

Hangtod nga usa ka adlaw niana, may gipaila si Gabriella kanako nga usa ka lalaki. Iya kuno kining bag-ong hinigugma. Gisakitan ko sa maong kasayoran. Apan naningkamot ko nga dili sila makasabot sa gibati kong kasakit. Sukad niadto, gilikayan ko na si Gabriella aron dili ako masakitan pag-ayo.

Apan sa kadugayan inanay nga nakasabot si Gabriella nga ako siyang gilikayan. Niini, iya akong gisukmatan.

"Ngano man nga naglikay ka na man nako karon?" ni Gabriella pa.

"Unsa ba kanang gipanulti mo?" nagpatuso-tuso ako.

"Ayaw paglimod. Nakasabot ko nga gusto ka nang molikay nako. Unsa may hinungdan, Ken?"

Nahilom ko.Nahimut-okan ko sa iyang gisulti. Dihay akong gipamalandongan.

"Gibugtaw ko lang ang kagawasan, Gabriella," matud ko pagkataudtaod.

"Kagawasan sa unsa?" ni Gabriella pa.

"Kagawasan gikan sa kagubot," nako pa. "Naglikay ko kay dili ko gustong makasala kanimo ug sa imong hinigugma."

"U-unsay buot mong ipasabot?" niya paw.

Nakahukom kong tug-anan si Gabriella sa matuod aron matibway ang tanan. Gipasabot ko siya nga buot ko siyang likayan tungod kay dili ko buot makalapas sa lagda sa among  panaghigalaay. Gitug-anan ko siya nga nakakat-on ko paghigugma niya.

Nakugang si Gabriela sa akong gisulti. Apan labaw kong nakugang dihang kalit siyang migakos nako. — Kataposan