What we know of God encourages us to trust Him in all we don’t know.

Unsaon na man lang niini ... Digna, nga gumikan sa kainit sa panahon sa hulaw, wa na man gayod mangunod ang tinanom kong kamoteng kahoy, sa akong gibaol sa may bukiran sa Kiwkiw? dihay kahisagmuyo sa akong dughan nga naghunahuna sa gikugihan ko og tanom.

"Dili na kana nimo angay kahibugngan ... Nisyo ... Kun moabot na gani ang unang semana sa bulan sa Marso, magsugod dayon sa pagpangliki ang yuta, ug mananting sa kaalingiting sa panahon!" misamot kanguhal ang tingog sa akong asawa, nga hilabihan nga nakasarap og higop sa sabaw sa tinughong ning kasayo pa sa kabuntagon.

"Unya ... paundayonan ta na lang kining maong kalisod sa atong kahimtang Digna? Unsa na man unya nga atong kan-on adlaw-adlaw nga nahutdan na man kita og igo nga salapi nga sarang tang ikapalit og bugas mayok nga atong lugawon?" dihay kaitok sa tuno sa akong sinultihan ngadto sa akong asawa.

"Suwerte lang nga wa pa kitay liwat nga anak nga sarang tang buhion?"

Sulod god sa duha ka tuig namong panagtipon ni Digna, isip magtiayon, wa pa gayod moabot nga makabaton kaming mag-asawa, nga makaliwat bisan usa na lang ka buok anak nga matawag og panganay.

"Tan-awa Nisyo, gumikan sa naghinubra nimong pag-atiman sa imong baol, nga gitamnan mo pulos og kamoteng kahoy, miresulta nga sa kinatibuk-an nga balangay sa Balungag, ang imo rang tinanom nga mga lanubo nga lagutmon ang wa makaani og insakto kay giabotan sa hulaw?" dihay sagol pagmahay ang nalitok sa ngabil sa akong asawa.

Unsaon tuod nga sa dili pa manugpa ang among mga manok, atua na man ako modayugdog og tungas sa bukiran sa Kiwkiw, diin didto ko itikad ang akong mga tinanom nga kamoteng kahoy.

"Naunsa god ka intawon, Digna ... nga nagpabadlong ka man?" gibuyag ko ang akong asawa, kay gibati ako og kahilas nga nagsud-ong kaniya nga naghubo sa iyang sanina, lakip na ang iyang underwear.

"Wa kini malisya ...Nisyo, igo ko lang ikaw gipahinumduman sa wa mo pagpakabana ... isip imong asawa nga nagkinahanglan  og pag-atiman!" dihay kasalabtonon sa pulong nga nalibkas sa ngabil ni Digna.

"Dili ako sama sa tinanom mong kamoteng kahoy nga wa  mangunod, gumikan sa kainit sa kuwaresma ... lahi sa akong kalawasan ... nga dili tuphon sa hulaw sa kahidlaw.! — Kataposan