Toni balik PBB

Wala na mipailalum sa operasyon si Toni Gonzaga, skin glue ang prosesong gihimo kaniya sa mga doktor dihang nagisi ang iyang ngabil, pero matud pa sa dalaga sakit kaayo kadto kay walay anesthesia.

Namumo ang nawong ni Toni dihang mi-dive siya sa swimming pool sa gihimo niyang commercial, four feet lang diay ang gilawmon sa pool maong pag-ambak niya diretsong napunta ang nawong niya sa pinakasawog sa pool, suma pa ni Manay Cristy Fermin sa PangMasa.

Usa ka amigong abogado nga fan ni Toni ang mitawag ni Manay Cristy, ug namahayag nga kung sa Amerika pa to nahitabo, daku kaayo ang responsibilidad nga tulubagon ang ahensiya sa nahitabo kang Toni, kinahanglang siguraduon sa nila og maayo nga walay mahitabong dautan sa ilang endorser.

Nalipong si Toni dihang naigo ang iyang baba sa semento, maayo gani kay nakalangoy pa siya pataas, pero nagdugo na ang iyang ngabil dihang mihaw-as siya.

Hangtud karon kay maklaro gihapon ang hubag sa iyang ngabil, ug sa nahitabo sa dalaga.

Suma pa ni Manay Cristy maayo na lang kay nakatayming ang advertising firm og pamilya nga sama sa kang Toni nga masinabtanon, kay kun uban pa to sigurado nga nagisi na ang bulsa og binayad sa nahiaguman sa TV host.

Kagabii balik na si Toni sa Pinoy Big Brother Season 2, dul-an sa usa ka semana pod siyang wala nakatrabaho.