Miss Mandaue mahinayon

Gihangop sa mga beauty affecionados ang mibuto nga balita kagahapon nga sukwahi sa unang mga taho, mahinayon ang Miss Mandaue 2007, diin gitakda nga ipahigayon kini karong Mayo 7.

Sa press statement nga nadawat sa The Freeman Entertainment kagahapon gikan sa organizers sa Mantawi Festival giulohan og "Ms. Mandaue Lives On," diin gipaila usab ang bag-ong muhupot sa nahisgutang indigay sa kaanyag- si Orlando Diola, ilado nga visual artist ug lumad nga taga Mandaue.

Si Diola matud pa usa sa mga nagsugod gayud og mugna sa nahisgutang pageant sa wala pa siya moadto sa Estados Unidos niadtong dekada 70, diin nabantog usab siya isip usa sa mga nagduma sa Miss Gay International sa daghang mga katuigan niadtong 1970''s. Mibalik siya sa Sugbu, 1990''s.

Lakip sa mga nagmaya pagkasayud sa maong balita mao si Bb. Pilipinas World 2006 ug Miss Mandaue 2005, Anna Maris Igpit. " I''m very glad that it is pushing through, its such a wonderful feeling that amidst all the issues coming out that would hinder them to go on with the pageant, its still gonna happen," nagkanayon si Anna.

Suma pa niya andam siya nga motabang kung magkinahanglan ang organizers niya, agi usab og halad ngadto sa mipanaw nga si Doy Arradaza kinsa maoy naghupot sa nahisgutang indigay sa taas nga panahon.

Si Diola nga nahinabi sa The Freeman Entertainment kagahapon nagkanayon nga: "I hate seeing a tradition broken. So I volunteered myself to handle the project. I''m going to use what little funds I have, apart from the solicitation I made since the Mandaue city government can''t offer funds.

Suma pa niya wala silay problema bisan og gamay na lang kaayo ang nahibilin nga higayon aron sila makapangandam. Tanang maglangkob sa working committees mga taga Mandaue. Gitug-an niya nga sa pagkakaron ang problema lang kay wala pa nila ma-contact ang kasamtangang Miss Mandaue nga si Nicole Schmitz, kinsa base sa nahibaw-an sa Banat Hugyaw mipauli pa sa Australia.

Modern Filipina ang tema sa indigay ug usa kini ka dinner show.