Banhawon ta ang Komiks

Gitinguha sa inila ug bantogan nga magsusulat ug debuhista sa komiks nga si Carlo J. Caparas nga mabuhi og balik kining maong matang sa arte pinaagi sa pagpasiugda og komiks caravan sa Luzon, Visayas ug Mindanao.

Ang nahisgutang tinguha gipahibaw mismo ni Caparas ug sa mega producer niyang asawa nga si Donna Villa atol sa usa ka press conference dinhi sa Sugbu ning bag-o lang.

Si Donna nga malampuson nga direktor ug producer sa pelikulang Pilipinhon, kahinumduman nga nagsugod sa tulo ka komiks nga gisulat ni Carlo J. Caparas.

Ang tulo ka labing unang mga pelikula nga gi-produce ni Donna Villa mao ang Paano Hahatiin ang Puso, Tuklaw ug Andres de Saya nga naghatod sa iyang kalampusan isip producer sa pelikula.

Ang komiks caravan ilang gitumong alang sa pagpahigayon og duha ka oras nga libreng seminar alang sa pagsulat ug pagdebuho sa komiks nga gikatakda karong Abril 24 dini sa Sugbu.

Kini magsugod sa alas 2 sa hapon sa adlaw nga Martes nga pagasundan gilayon sa open forum ug libre nga snacks alang sa tanan nga motambong diha sa karaan nga Capitol session hall.

Nagpadayon na ang pagpanglista alang sa mga interesado, ug mulungtad kini hangtod sa Abril 21. Walay bayad ang pag-apil sa maong seminar sanglit libre ang pagpasiugda ug wala usab kini magpili og panuigon sanglit ang tanan mahimo man nga mo-apil.

(Aron malista text o tawag ni Sir Sam Costanilla sa 09154992844-ed)