Banat Hugyaw ‘Bisrock Siblings’

Mas nidaghan ang nakaila sa managsoong Ryan ug Renan Cuizon tungod sa ilang kalambigitan sa paglipang sa Bisaya rock. Kini tungod kay sila mismo kabahin man sa "Indephums" isip drummer ug gitarista.

Ang duruha ka Cuizon ikatulo ug ikaupat sa unom ka mga magsoon. Ang ilang mga maguwang mao silang Efren nga naminyo na ug si Analou, usa ka magtutudlo. Samtang ang ilang mga manghod mao silang Randy, nuybe anyos ug Junrey, otso anyos. Reynaldo Cuizon, Jr. ang tibook pangalan ni Ryan. Samtang Renante usab ang tinood pangalan ni Renan. Natawo sa magtiayong Fe ug Rene si Ryan niadtong Hunyo 16, 1984. Niabot sa ilang kinabuhi ang wala damhang "little drummer boy". Samtang niadtong Marso 23, 1986 natawo ang "little lead guitarist."

Sa gagmay pa sila, sama sa ubang mga bata sa ilang kasilinganan, magsige sila og away bisan sa mga butang nga wala’y hinungdan. Ug mosangpot ngadto sa sinukliay og nagpungasing mga kinumo. Tungod kay manghod man si Renan, siya ang permanenteng maalaot kay siya man ang kanunay’ng unang masakitan ug maghilak.

Apan matud pa ni Mama Fe, "all the time sila ra sad gyud ang magkasinabot. Mga siaw kaayo na sila." Mao usab kini ang paghulagway ni Analou kon Atephums. "Kalog kaayo na silang duha. Si Ryan bata-bataon nga may pagka-istriktohon. Si Renan pinaka-walay libog sa tanan. Pinangga kaayo na si Renan ni Papa Rene kay never gyud na siyang motubag-tubag."

Saysay ni Mama Fe nga bisan og close kaayo ang tanan niyang anak niya, diha matud pa’y usa ka higayon nga naupos ang iyang pailob sa duruha tungod sa ilang kasipat ug pagpunay og away. Gipagawas niya ang duruha sa ilang balay, ngadto sa mangiob nga lugar tungod kay nakahibawo man siya nga hadlok sa ngitngit ang duruha tungod sa pagtuo nga duna’y abat. Kini maoy nakahatag og leksyon sa magsoon nga undangon ang ilang punay nga panagbangi. Permi sad silang mabunalan kay ang ilang mga video tapes sapawan man nila og salida nga "Dragon Ball Z", asoy pa ni Mama Fe.

Gipaambit usab ni Mama Fe nga dili sayon mahimong inahan sa duruha. Durong kakuyaw sagol kalagot ang iyang gibati sa dihang milayat sa ilang bintana si Renan aron mokagiw tinukmod sa pagpanglood. "Sige man gud na siya’g panungog sa iyang ig-agaw nga dinhi nagpuyo sa amo-a. Mahibulong na lang mi nga maghilak man ang iyang ig-agaw. Mao diay kay iyang sungogon sa taman. Mao ‘to ang hinungdan nga amo siyang nabunalan ug nakasab-an og taman. Tungod siguro kay nauwaw siya nga wala siya labani namo, mao to naghambin siya’g kahiubos," ni Mama Fe pa.

Lain pang pabadlong ni Renan mao nga iyang gigasto ang kwarta nga para bayad unta sa iyang tuition. Hinatag kadto sa iyang Papa Rene. Halos mapawong ang panan-aw ni Mama Fe sa dihang nahibaw-an nga wala diay ibayad ni Renan ang gihatag nga kwarta. Nagdali-dali siya pag-adto sa eskuylahan aron mosaad pinaagi sa usa ka "promissory note" nga areglohon lang ang kuwang sa tuition ni Renan aron lang gyud makakuha kini sa maong pasulit.

Ug miabot ra gyud ang pag-ulbo sa magtiayon sa dihang usa ka adlaw niana ilang nakita nga samtang naghigda-higda sa sopa si Renan, duna’y marka sa bun-og ang likod nga bahin sa iyang paa.

Sa sinugdanan, grabe ang paglimod nga gibuhat ni Renan nga siya nagpasakop og usa ka fraternity. "Sa kabalaka nako nga mahisama siya kagrabe sa uban nga pinasagdan, ako nalang siyang gipa-undang sa iyang pag-eskwela," pu’ng ni Mama Fe. Dinhi ning tungora nitiyabaw si Renan ug mipasalig nga dili na ipadayon ang tinguha nga magpasakop sa fraternity, ug nga magtinarong na siya sa iyang pagtoon.

"Black sheep man gyud ko sa amo-a. Dali ra ko madala sa mga barkada usahay," pag-angkon ni Renan nga gihulagway nga mas maabi-abihon sa mga barkada kay ni Ryan.

Si Ryan kuno kon masuko, mosulod lang sa lawak niini ug ipahimungot sa iyang punda ang kalagot. "Iyang gisi-gision iyang punda. Pilian sad na siya og mga higala. Pero entrepreneur-in-the-making gyud na siya," dugang ni Mama Fe.

"Kami ni Renan, we have our own sewing machines and we make bags and wallets," saysay ni Ryan.

Editors Note: Ugma puhon sayri unsay kalainan sa managsuon, unsay gipangita nila nga mithi sa babaye nga ilang higugmaon ug unsay sinugdanan sa ila nang pagkatukod isip Indephums, usa sa kihangop karon og maayo nga Bisrock bands sa Sugbu.