Malampusong Tigmugna sa mga Batan-ong Mag-aawit

Kining pulong nga patigayon nagkahulugan kini og negosyo. Nahitakdo usab kini sa bansagon sa tawo nga mao karon ang atong hisgutan, si Eddie Patigayon. Siya nakaani og dakung kalampusan sa iyang paghalad og panahon ug paghago pag-umol sa mga batan-on nga makat-on ug magmalampuson ugma damlag sa natad sa arte ug sa awit. Malampuson usab siya sa iyang patigayon sa pagtukod og usa ka recording studio.

Tungod sa daku niyang tinguha nga ang mga batan-on makat-on sa arte sa pag-awit, siya migasto gayod og dakung puhunan nga salapi ug panahon pinaagi sa pagpalit og takna sa usa ka estasyonan sa radyo aron iyang pasiugdahan ang bangga sa pag-awit nga gitawag og " Kaplag sa Bituon." Matud niya nga pinaagi sa bangga sa pag-awit iyang mapalambo ang kulturang Sugbuanon sama sa arte sa pag-awit ug uban pa.

Ang tulumanon nga ‘Kaplag sa Bituon" gipalanog sa kahanginan gikan sa tuig 1967-1972 pinaagi sa kahimanan sa dyRB; dyRE sa 1972-82, dyLA 1982-85; dyKC 1988-1995 ug sa dyMF 1993-1998. Ug tungod sa suliran sa panalapi, giusa na lang kini pagsibya, diha sa dyRB sukad niadtong 1995 hangtud karon, matag Biyernes sa alas 11 hangtud sa 12:30 sa udto nga manukad diha sa Gaisano Main Foodsquare. Makita usab kini sa Channel-13, sa Skycable sa susamang takna ug adlaw.

Kaniadtong Hunyo 30, 2006 gisaulog ang ika 39 ka tuig nga kasumaran sa pagkatukod sa nahisgutang tulumanon sa radyo. Ang "Kaplag sa Bituon" naka produce na og mga batan-ong mag-aawit, usa kanila mao si Edison Monternel nga nagmalampuson na sa pagkakaron dili lamang dinhi sa Sugbu kundili hasta na usab sa gawas sa nasud ug makita usab siya matag karon ug unya sa telebisyon ug mga duwa sa entablado.

Pagkakaron aduna na usay laing tahas nga pasiugdahan si Eddie, ug kini mao ang pagbanhaw sa mga immortal kon naila na kaayong mga awit nga Binisaya. Iya kining himoan og plaka aron pag-preserbar sa kanhing Sugbuanong mga awit sama sa "Garbosong Bukid," "Wasay-Wasay," "Dalaga sa Bukid," "Mutya sa Buhat" ug uban pa. Kining maong mga obra maoy himoon niyang unang proyekto sa bag-o niyang recording studio. May lain pa usab nga bulohaton si Eddie gawas sa pagtudlo sa mga batan-on sa arte sa awit. Kini ang pagpalambo sa bag-ong programa niya sa radyo mao ang "Star Search for Recording Artist."

Si Eddie nihaom gayud sa iyang bansagon tungod kay ang tanan niyang patigayon ug kawsa nagmalampuson. Dili lamang siya promoter ug direktor, usa usab siya ka composer. Pipila sa mga awit nga iyang gigama nahimoan og plaka sama sa "Forever More," "Di Na Uso," "Atras Abante Pakaak Mamaak." Siya usab ang nagmugna sa Cebu Association of Legitimate Musical Artists kon CALMA, kauban si Doy Montaña nga mao ang presidente sa nahisgutang kapunongan.