Freshest Boiz: Mas daring, mas agresibo na

Batan-on. Dunay pambato nga talento sa pagsayaw. Dunay ambisyon. Sila ang Freshest Boiz, grupo sa mga bayong-bayong maayong mosayaw ug inanay na nga mihimo og pangalan alang sa ilang pundok. Salamat nga kanunay sila nga makita diha Oi Show Nato Ni matag Domingo sa buntag sa GMA-7. Kamatuoran nga duna na silay sumusunod mao ang ilang pag-bag-o og imahe diin inanay na sila nga mihingkod kon pamiste ang hisgutan. Medyo daring na ang imahe sa Freshest Boiz, sanglit kini matud pa ang dugay na nga hangyo sa ilang mga fans.

Lahi kaniadto nga naputos sa biste ang ilang lawas, karon duna na silay kaisog nga mopakita sa ilang mga nipples. Gibutyag ni Alfie Amamangpang, lider sa grupo nga mao na kini ang ilang imahe karon sanglit hagbay ra nga dunay panawagan alang kanila nga mohimo sa maong lakang.

Dali nga gipasabot ni Alfie nga dili angayang sabton nga daring ang ilang imahen karon motugot na lang usab silang magbuhat og law-ay. "Sexy wholesome" lang ang ilang imahe apan nungka nga mutugot sila madaot diha sa mga mata sa mga batan-on nga nag-idolo kanila. Ang mao nilang bag-ong imahen gitawag nila og "other side of Freshest Boiz".

"Dili buot ipasabot nga daring mi something nga malicious pero something nga among ipakita nga we are not only good in dancing but we have sexy bodies and looks," paneguro ni Alfie ngadto sa Banat Hugyaw.

Sa milabay’ng duha ka tuig sa pagkatukod sa Freshest Boiz ilang gipakita nga inosente ang ilang imahen apan karon gipakita nila nga mga hingkod na sila.

Ang VL Studio diha sa Tabunok maoy sponsor sa mga pictorial sa grupo ug ang ilang mga hulagway gipamaligya usab kini sa nahisgutang studio tungod kay ang ilang mga fans mihangyo nga mopalit niini. Kahinumduman nga ang grupo mitukod usab og mga grupo sa mga batan-on nga babaye nga mao ang Freshest Babes ug umaabot na usab ang grupo sa Freshest Kids.

Karong petsa 24 niining buwana mopahigayon og audition ang Freshest Boiz para sa mga Talisaynon nga chikiting kinsa mahiligon sa pagsayaw, kanta ug arte. Ang edad nga kwalipikado para sa Freshest Kids 11-13-anyos babaye o lalaki.

Sa mga fan sa grupo atangi ang ilang dakung concert nga nag-ulohan og "The Talisay Champions" nga ipahigayon karong Abril 28 diha sa Tabunok Sports Complex.

Ang makabenipisyo sa maong concert mao ang mga special children.

Ang gustong mosalmot sa audition text lang o tawag sa numero sa cell phone 09105749899.