Models ug dancer midaog sa Mr. Campus 2007

Sakop sa cast sa Cebuanovela "Summer Sunshine", nga mobukas sa alas 9.15 karong buntag sa ABS-CBN ang midaog isip Mr. Campus Face 2007 atol sa grand finals night niadtong Sabado sa gabii sa MCWD Auditorium. Siya mao ang 17-anyos nga si Edgar Rey Mesa, tinun-an sa University of Cebu sa kursong Nursing. Ang freelance model nga dunay gitas-on nga 5'10 ug moreno, mitug-an sa Banat Hugyaw nga wala siyay plano nga mag-showbiz apan gitanyagan siya sa Kapamilya og role sa bag-o niining soap busa iyang gidawat.

Ang direktor ug scriptwriter sa maong soap nga si Jurey Mirafuentes mitino usab sa Banat Hugyaw nga apil gayud si Edgar isip bandmate sa leading man nga si Andrew (Blue Marc). Si Edgar ug ang duha niya ka runners-up maoy morepresentar sa Sugbu alang sa Mr. Campus Face 2007 National Finals karong Hunyo adto sa Manila. Ang mikompleto sa Top 3 mao sila si Gregi Echavez, HRM freshman sa University of San Jose Recoletos (first runner-up) ug si Ryan Pantaleon, Information Technology junior sa University of Cebu (2nd runner-up).

Diriyot magubot ang maong indigay human nga si Pantaleon wala malakip sa pagtawag isip usa sa mga naglangkub sa Top 15, bisan pa man og tulo na ka minor awards ang iyang nalangkat ug dili malimod nga siya maoy "crowd favorite." Taud-taud mipasabot ang host nga si Monica Encierto nga dunay nagtabla ang score dungan usab sa pag-angkon sa show director nga si RC Perez nga duna silay nasinati nga "technical problem" sa "tabulation of scores." Pilay istorya, nasulod si Pantaleon ug nahimo na nga Top 16. Perteng abiba sa mga supporters sa nahisgutang kandidato, apan tataw kaayo nga nawad-an na og gana ang nahisgutan ug gilaay na. Human sa pagpahibawo sa resulta, si Pantaleon nagkanayon ngadto sa Banat Hugyaw nga," na-shock ko basin naay something, nawad-an nakog gana."

Samtang alegre ang istorya sa pagpanimpad ni Edgar tungod kay matud pa niya, sa high school pa siya kanunay siya moapil og mga personality contests apan wala gayud siya midaog. Busa ang iyang kalampusan karon maoy labing una niya nga titulo. Matod pa niya gigutom na siya kaayo dihang nagsininggitay na ang mga tawo kay wala nasulod si Pantaleon sa sinugdanan, busa buot lang niya nga mahuman na ang indigay para masudlan ang nagkutoy niya nga tiyan.

Ang Josenian nga si Gregi, kinsa sakop sa Adelante Dance Troupe unang salmot pa lang niya og ingon niadto nga indigay ug matud pa niya napugos lamang siya sa iyang mga higala busa iya lang gisuwayan. Apan karon nga nakadaog siya, bukas siya sa bisan unsang posibilidad nga muabot sama pananglit sa pagpamasin sa natad sa showbiz.