Dennis magbinayot na pod

Human misaad nga dili na siya modala og bayot nga roles after Aiste Imasu, gibakwi ni Dennis ang maong pamahayag tungod kay kumpirmado nga susamang character ang iyang hatagan og kinabuhi sa Lenten Special sa Eat Bulaga.

Ang project gioluhan og Unico Hijo, diin gipaabot nga magbinabaye og sinena si Dennis. Apan dali niya nga giklaro ang tulo ka rason nganong nausab ang iyang baruganan, una naikog siya ni Mr. Tony Tuviera, big boss sa TAPE Inc., nga maoy nangunay og hangyo niya, ikaduha mao nga lain na pod kining oportunidad nga makauban niya og balik ang beterano nga si Eddie Garcia, nga katrabaho niya sa Darna ug Blue Moon, ug ang ikatulo nga rason mao nga panaad na niya nga mohimo og Lenten Special tungod kay mao kini naghatag og swerte niya.

Matud ni Dennis nga dihang gimugna niya ang Angel Villa niadtong 2004 alang sa Eat Bulaga gihapon, nagsunod-sunod ang iyang projects-Mulawin, Darna ug Majika. Karon nakuha na pod siya alang sa Super Twins.

Samtang dihang gibalik og pangutana kun tinood ba nga mabdos ang iyang kanhi uyab nga si Carlene Aguilar ug matud pa siya maoy amahan, tubag ni Dennis nga "I'm not sure yet."

Kahinumduman nga una na niyang gipamahayag nga imposibli nga magsabak ang kanhi Bb. Pilipinas World 2005 ug siya maoy responsabli tungod kay dugay na sila nga wala magkita, hinoon sige sila og padala og mensahe sa text.

Dungan niini, certified singer na si Dennis tungod kay gi-release na ang iyang self titled debut album under sa IndiMusic nila ni Ogie Alcasid ug Regine Velasquez.

Last Sunday gilusad ang maong album sa SOP ug sa labing unang higayon nadungog sa publiko ang pipila ka cuts sa gipaabot nga album.

Cogie ug Lovi dunay LQ?

Tataw kaayo ang tensyon tali nila ni Cogie Domingo ug Lovi Poe sa taping sa Bakekang niadtong Lunes. Suma pa sa PangMasa nga nakasaksi sa duruha, wala magtinagdanay ang nahisgutan.

Una niini late nga miabot si Cogie sa taping, ug nagpaabot og dugay ang staff and cast niya. Wala siya makatunga sa location 1 and 2, ug kun pangutan-on si Lovi hain ang iyang "special friend," bugtong "hindi ko po alam," ang tubag sa dalaga.

Pwes, duna ba silay LQ o lovers quarrel? Pak! Kay niangkon na diay? Paet! Suma pa sa PangMasa, gabii na dihang mitungha si Cogie sa taping busa natino sa press nga dili gyud maayo ang relasyon karon sa duruha. O posible nga break na sila! Pak! Again niangkon na diay?

Matud sa PangMasa, ugma puhon ang show ni Lovi sa Metro Bar, West Ave, ug kun mutunga siya, buot ipasabot nag-uli na sila sa maayong kabubut-on.

Kauban diay ni Lovi sa maong show sila si Ara Mina, Ogie Alcasid, Arnell Ignacio, Take Five sa SOP/ GMA 7, Metafour Band, First Five Band. Front act si Lyn Reyes with surprise guest. - Ryan Mark