Good Luck Elvira

Elvira Illuminada Stehr, nailang "Cebu's Catwalk Diva" sa kasamtangan, usa sa mulugwa karong 8:30 sa gabii sa RPN 9 sa pormal nga pagsugod sa Philippines Next Top Model. Siya maoy labing taas sa tanang 14 ka mga kandidata nga magtigi sa titulo nga mulungtad balig 15 ka episodes. Ang PNTM, pinasubay sa sikat na kaayong "America's Next Top Model" nga gigama ug gidala sa naila na kaayong Supermodel nga si Tyra Banks. Ang Philippine version, ihatud pinaagi sa paningkamot sa Solar Entertainment diin ang beauty-queen/actress/socialite nga si Ruffa Gutierrez ang host.

Sa gitas-an on nga 5'10, si Elvira kanunay nga maalaan nga langyaw gyud gawas lang kun mubaka na siya sa iyang baba diin lareno kaayo siyang mobisaya. German ang amahan ni Elvira samtang ang iyang inahan Sugbuanon, diin kasamtangang nanimuyo ang iyang pamilya sa dakbayan sa Lapu-Lapu.

Mga duha na katuig ang milabay dihang mikalit og sulbong ang ngalang Elvira Stehr sa fashion circuit sa Sugbu. Samtang milaag siya sa usa sa mga sikat nga malls ning dakbayan, nasigpatan siya sa banggiitang fashion photographer nga si Jon Unson. Ang kadaot ni Elvira maoy mitawag sa atensyon ni Jon. Sanglit photographer, si Elvira maoy nahimong modelo ni Jon, wala mag-dugay milugwa na ang dagway ni Elvira sa nagkadaiyang mantalaan hangtud nga nahimo siyang paborito sa mga inilang designers sa Sugbu. Sa pagligid sa mga adlaw, mitekang si Elvira sa nataran sa Models Association of Cebu, ang naila na kaayong runway and print modeling agency nga maoy pinuy-anan usab nila ni Melanie Ediza, Karla Bautista, Anna Maris Igpit, Stephanie Senires ug daghan pang naila na kaayong models ning dakbayan.

Kasamtangang gibiyaan una ni Elvira ang iyang pagtuon sa kurso nga Tourism sa University of San Carlos aron tumanon ang iyang pangandoy nga mas magmalamboon ang modeling career. Karong gabii, pinaagi sa PNTM, magsugod ang panaw ni Elvira paingon sa inanay na nga katumanan sa iyang damgo nga mahimong residente sa modeling circuits sa kalibutan sama sa Milan, Paris ug New York.