Manag-iya sa prestihiyosong korona

Nagkagubot na pod ang mga mahiligon sa beauty pageants. Sa nagkadaiyang forums sa Internet nagkalain-lain lang ang mga panagna. Dunay mga nangaway, dunay milaban sa ilang mga manok. Kining tanan tungod kay karon gabii pilion na ang labing maanyag nga babae sa nasud pinaagi sa Bb. Pilipinas 2007 sa Araneta Coliseum. Traynta ka mga babaye ang gitakda nga mag-ilog sa tulo ka prestihiyoso nga korona- Bb. Pilipinas Universe, Bb. Pilipinas World ug Bb. Pilipinas International.

Sa tanang mga kandidata, labing sikat kanila mao ang GMA-7 star nga si Maggie Wilson diin daghan ang mitagna nga siya na ang pambato sa Pilipinas alang sa Miss Universe 2007 sa Mexico. Apan dunay miingon nga malubong ang kaanyag ni Maggie kun itupad na siya sa mga Latin beauties busa mas haom siya alang sa Miss World.

Laing giistoryahan karon og maayo sa nagkadaiyang forums mao ang atong garbo sa Sugbu nga si Nicole Schmitz kinsa maoy kasamtangan nga Miss Mandaue. Suma pa si Nicole maoy haom alang sa Miss Universe sanglit ang iyang pagka mestiza sigurado nga dili kabentahaan ug sigurado gayud nga milugwa tungod kay lab-as kaayo ug makabibihag ang iyang dagway. Daghan ang nagtuo nga masulod gyud siya sa Top 5 karong gabii.

Samtang ang mga lumalaban ni Anna Therese Licaros dili pod magpapildi sa ilang ratatat nga siya maoy magmadaugon karon gabii tungod kay siya matud pa ang tinood nga "beauty and brains." Hinoon sa credential pa lang daan tinood nga dili gayud siya basta-basta, Summa Cum Laude sa UP, One of the Top 10 Most Outstanding Students of the Philippines 2005, Law student, dunay gitas-on nga 5'9" ug freelance model ubos sa pagduma ni Beauty Queen Maker Jonas Gafud.

Ang kasamtangang Bb. Pilipinas World nga si Anna Maris Igpit naglantaw nila ni Abby Cruz, Misty Francisco, Melanie Adrajani, Paulette Quinto,Jaimie Burgos, Grezilda Adelantar, Keann Mallari, Liezel Verses, Erika Pangan, Licaros, Wilson ug Nicole nga maoy masulod sa Top 12. Matud ni Anna, tulo niining mga kandidataha ang molangkat sa korona base pod sa iyang naobserbahan sa nagkadaiyang mga aktibidad nga gipahigayon sa Binibining Pilipinas Charities aron pagsukod sa katakus sa 30 ka mga dalaga nga naglaum nga makaangkon og titulo.

Sila si Ruffa Guttierez, Miss World 1993 2nd Princess ug Miss International 2005 Precious Quigaman ang lakip sa maglangkub sa panel of judges samtang si Miriam Quiambao ang host. Asian Royalty ang tema sa indigay karong gabii nga makita karong alas dyes sa GMA-7.

* * *

Vote for Nicole just type: MB (space) POLL (space) BB (space) 4 your complete name/ address/ age send to 2269 for Globe and Sun subscribers 6800 for Smart users.