Ossified, Flirt out na ang EP album

Gihugopan sa kapin kon kulang tres mil ka mga Bisrock enthusiasts ang "Bisrock to the Max" niadtong Pebrero 24, Sabado diha sa Millennium Park, dakbayan sa Lapu-Lapu. Dili lang mga taga Lapu-Lapu (Opon, Mactan, etc.) ug Cordova ang nag-abot. Nahimong "inter-barangay convergence zone" ang ilawom sa taytayan sa Marcelo Fernan sa mga Bisrock enthusiasts gikan pa's kasitiohan ug kabarangayan sa Mandaue City, Mambaling, Basak, Pardo, Talisay City, Minglanilla, Naga, Capitol Site, Lahug, Banilad ug Talamban. Whew! Di matabas-tabas ang suportang gipakita sa mga mahiligon kaayo sa paningog nga Bisaya rock. Labi na gyud ang mga clans nga isig bansiwag sa ilang mga banner ug streamer, sama sa Bisrock Lovers Clan nga nagkadaghan na man gyud ni sila karon. Mora man ni sila'g rabbit humok kaayo mosanay. Ug ang bag-ong kaplag nga Ambungan Clan nga pihadong nakakuha'g inspirasyon gikan sa among partner sa Smash FM "BisrocKabataan" program nga si Bré Ambungan nga maoy host niadtong gabhiona.

Daw mga bukong na lang ang mga ulong nagpuli-puli'g lukso-lukso ug layat-layat niadtong gabhiona, kon adto nimo tan-awon sa ibabaw sa Marcelo Fernan bridge, tungod kay daw hulmigas nga nagpunsisok ang mga Bisrockers aron masaksihan ang usa ka pasundayag nga halad sa beteranong musikero sa Sugbu, si Maximo "Max" Surban. Mora ba'g mga hantik ang mga tawo nga nagtabang og dimdim og dugos tungod sa duha ka poste sa taytayan.

Bagang duot ang nilabyog sa "Vendors Boogie" nga gi-cover sa sekreto-para-bibong Retdem; niikid sa "Diskoral" sa nahigugma sa mga reyna-prinsesa nga Circle of Willis; nagkapa-kapa sa "Pasayawa ko Day" nga gi-jazz sa gamay nga kalibotan sa KDB; namalitok sa "Sa 14 Pa Ako" nga gitayhopa'g rockistang paningog sa mad'a ra'g smile nga Ossified. Wala sad paawahi ang mag-album launching karong Marso 10 sa Handuraw - ang nagpangita sa ilang Ginoo nga Glass of Dirt. Ni-headbang sad ang mga tawo sa ilang bug-at nga "Pastilan Kanimo No. 1." Ug nakig-apir ang nag-ayo-ayong Indephums sa ilang bersyon sa "Apir". Samtang mihirit ang royal rumble sa What's The Frequency sa diha'ng ilang gipalanog ang "Libakera" (himantayon…tabian pa'ng number one, wa'y silingan…)

Ang mga tawo nisadsad usab sa pagbunal ug pagrakrak sa lain pa'ng mga banda nga naglangkob sa 17 ka mga gidapit - ang Station Avenue (Kurdapya), Fervent (Igo Na Day), Wet Slipperz (Tambok ug Niwang), Aggressive Audio (Opaw), Missing Filemon (I Love My Teacher), Kabobo (Pamilyang Yonik), Agipo (Bibingka ug Budbod), Assembly Language (Unang Pagtan-aw Ko'g Sine) ug Republika (Gihidlaw na Intawon Ako aka Mitulo Na). Kining last two maoy akong mga kinaham, lakip ang "Manok ni San Pedro" nga wala ma'y nakahuna-huna sa pagkanta, tsk! tsk! tsk!

Sa laing bahin, nahimuot kong Inday Emo, usa ka batan-ong punkista nga taga University of San Jose-Recoletos Basak campus kay nakatuaw siya sa dihang ang "Baleleng" nga gi-cover sa Agadiers gisambogan sa "Welcome to My Black Parade" sa Chemical Romance. Mao to'y giingong "lahugay sa mga band influences".

Mga panghinaot nga ma-replicate kadto sa lain pa'ng mga barangay aron kahatagan usab og lingaw ang mga mahiligon sa Bisaya rock sa nagkalain-laing bahin dinhi sa Sugbu. Para hakop gyud tanan, di ba Gil "Choy" Truya sa Deadspotters Society? Ug Choydhegz sa U-Gen Bisrock Clan-Mactan? Ug Ann sa Bagnuz Bisrock Clan. Unsaon ba gyud na pag-spell inyong Bagnuz? Bagnos? Bagnuz? Pag-short mo, woist! (hee hee…)

Sa laing kalamboan, out na ang Extended Play album sa Ossified ug Flirt. Gihatod mismo ni Carl Michael Geverola, gitarista sa Flirt, ang usa ka kopya isip sampler dinhi sa pamuhatan sa Banat niadtong miaging semana. Samtang, niadtong Sabado sa gabii giapod-apod sa Ossified ang ilang EP atol sa "Bisrock to the Max" nga concert.

Ang Flirt EP album may lima ka tracks - Somehow, Sabaw, Demalas, Palaaway ug Nailad. Mapalit kini sa tag P50 matag kopya. Alang sa friendster account, palihug og suroy sa [email protected]. Suroya sab ang purevolume.com/flirts. Alang sa mga orders, tawagi si Carl sa 09158360314 ug 09204765673. Landline 3428568.

Naglangkob sa Ossified EP album ang mga kantang 13C, Mad'a Ra'g Smile, Problem Solving, Deep Pressed ug usa ka kantang Ininglis - ang Reach You Out. Gikan kini tanan sa panulat ni Bernard Fario, ang kaniadto gianggaan og "official mascot sa Bisrock", nga aduna'y "Hagtik-Titik" orientation tungod sa iyang pagka-literary writer sa Lakandiwa, ang opisyal nga pamantalaan sa mga nanagtungha sa University of Cebu main campus.

Mapalit ang Ossified EP sa tag P70 ang kopya. Puhon, available na ang duha ka nahisgotang mga albums sa Manu, 2nd floor sa E-Mall. Pangita-a lang si Badet.

"ATTN: Königs has been nominated for Video of the Year (NGANONG NI-ENTER) in the 2007 Philippine HipHop Awards. To support, please type MX<space>VOTE<space>PHA<space>VID_ENTER and send to 216 for SMART/TnT, 2800 for GLOBE/TM, 2288 for SUN. To watch the video go to www.freewebs.com/königs."