Sexy nga anghel

Human sa kontrobersya nga gilambigit ngadto ni Angelica Panganiban nga matud pa giretoke ang iyang mga hulagway alang sa kalendaryo sa usa ka ilimnon, subling nagpasexy ang young actress isip cover girl FHM March 2007 issue.

Suma pa ni Angelica nga nasayod siya nga kaniadto pa dihang gihimo niya ang Santa Santita, duna nay tanyag ang maong men's magazine kaniya apan iya kining gibalibaran tungod kay alang niya sakto na kadto nga lakang aron ipahibaw nga andam na siya alang sa mature roles.

Gawas pa matud niya importante pod ang timing ug niadtong panahona alang niya dili pa ang tukmang panahon nga magpa-sexy siya. Apan karon nga andam na siya, ang big boss sa Star Magic nga si Mr. M maoy iyang gipadesisyon, ug misugot ang naulahi hinungdan nga go gyud dayon ang iyang beauty.

Lakip sa mga nahisgutan nila sa FHM interview mao ang iyang natagamtaman nga kagawasan gikan sa poder sa iyang ginikanan sanglit nag-inusara na man siya og puyo karon, ang iyang paborito nga kalingawan kun duna siyay bakanteng oras ug ang iyang love life.

Nasayran nga sa Bohol gimugna sa FHM ang maong pictorial diin ang nagkadaiyang white beaches sa maong nindot nga probinsya ang nahimong location.

Gitin-aw ni Angelica nga gisuportahan siya sa iyang inahan sa iyang desisyon nga mag-inusara siya og puyo lahi sa mga nanggawas nga nagrebelde siya hinungdan nga mibiya siya sa ilang pinuy-anan. Gani matud ni Angelica nga gitabangan pa siya sa iyang inahan pagpangita og condo unit.

Makalibog ang tubag ni Angelica dihang gipangutana siya sa FHM kung "single" ba siya kay miingon kini nga "I think so," dayong pahiyom unya midugang sa pag-ingon nga, "Ewan ko, I'm still confused!"

Ang klaro mao nga wala mahadlok si Angelica nga puro pagpasexy na lang ang projects nga itanyag ngadto niya tungod kay suma pa niini, nasayod siya nga mao gayud kini ang iyang padulngan. Dali siya nga midugang nga basta dili lang siya pahubuon walay problema niya.

Apan matud ni Angelica nga kun siya maoy pabut-on, FHM mao nay katapusan niya nga paglugwa sa usa ka men's magazine.