Mabulokon ang 'African Night' sa M/V Doulos

Manay Judith Sue, very colorful gyud ang pasundayag sa mga volunteers nga tripolante sa M/V Doulos (sa pinulongang Griyego nagakahulugan og "ulipon") niadtong Enero 27, Sabado, sa gabii. Daw sa hulmigas ang mga tawong nanaglinya pasaka ug kanaug sa barko nga 92 anyos na ang panuigon. Take note Ellesen Isugan nga manghod lang ning barkoha sa Titanic ug duha ka tuig, pero as in functional pa gyud siya hangtod karon. O ma-take na nimo diha Manay Judith Sue nga 92 years old nya sha pero mapuslanon pa?

Ang Titanic hagbay ra'ng napikas mora'g sodatine ug nahimong breeding ground sa mga isda, samtang ang M/V Doulos parehas nimong astig ug fayter pa - padayon pa's iyang misyon sa pagsabwag og "cultural understanding" ug "worldwide education" pinaagi sa usa ka book fair ug community outreach programs. Sukol gyud sha ug sungasong sa mga dagkong balud ning kinabuhi nga buot watas-watason sa mga bagyo sa pagsulay!

Nikatol gyud akong tiil adtong gabhiona pagtikang balik sa Doulos kay gawas sa akong pagpakighinabi ni Pastor Daniel Wong sa The Living Christian Church sa Lahug, kauban sa iyang Bisdak nga asawa nga si Stephanie nga suportado kaayo sa mga kalihokan sa Doulos kauban si Reka Borsiczky sa Hungary (in-charge sa tanang press people), aguyyyyyy pagkanindot naman gyud sa 12-man South African band nga naglingaw sa mga inumol sa Diyos! You missed jud a quarter of your life kon wa mo kadungog sa piano, flute, African drums, acoustic guitar sa mga talented kaayong mga sakop sa maong banda nga diha'y Cameroonian ug Tanzanian kansa mipakita pa sa iyang pagkasakop sa Masai tribe, usa sa 27 ka mga tribu sa Tanzania. Nakakanta gyud ko sa hilom og "so many faces, different races...every color, every hue is represented by me and you" (Francis M jud Manay Judith Sue!)

Hinoon diha'y mga kanta nga giawit sa linggwaheng Afrikaan ug diha sa'y Kenyan sama sa "Hakuna Matata". Diha pa gyuy showdown sa Xhosa language of the Bantu people. Kon katimaan mo adtong lilas "Gods Must Be Crazy" nga si Nixau gani (isip si Xi) kauban ang iyang mga katagibalangay nga Bushmen madunggan nato nga makigtigi og binayloa'g hunahuna sa paagi nga mora'g nanakla? Mao to siya ang sample sa Xhosa language, diin mogamit sila'g clicking/clucking samtang sila naglitok sa ilang lumad nga pinulongan. Hasta gyung hugyawa. Pakpak pa'y imo nga daw makalumos, Ellesen Isugan. Di gyud matabas-tabas ang matang sa lingaw basta ang tanan ihalad nato balik sa Ginoo, di ba?

Nindot sad tong gabhiona kay sponsor ang Nescafe. Unlimited gyud ang kape sa Doulos. So ang imo na lang paliton Manay Judith Sue kadto na lang ilang lamiang mga cakes. Ang maong mini-concert gisambogan pa gyud og usa ka film-showing sa mga buhat sa kalooy nga didto pagahimo-a sa Djibouti (pronounced Dzi-boot-see). Ingon man ang usa ka proyekto may kalabutan sa limpyong tubig sa Mozambique (Mo-zam-beek) kay clean water daw is so hard to come by aning lugara. Matud pa's master of ceremonies nga White South African nga tinood dato ang South Africa tungod kay highest sila when it comes to platinum mining, pero sus ang kapobre di sad matabang. Gipakita sa maong documentary nga dako nga parte sa Africa nag-antos sa tumang kawad-on, kagutom, kakulang sa tarong nga serbisyong medikal. Apan taliwala niini, nanganta ang mga sakop sa banda og usa ka pasalamat sa Diyos nga ilang nakaila ug karon gisilbihan. Gisundan kini'g mga testimonya sa mga volunteers ug usa ka quiz show aron pag-testing kon unsa ta kabatid sa general info kon Africa na'y pagahisgotan.

Pinaagi sa usa ka multimedia clip, gipadayon pa ang pagpakita sa uban pang bahin sa Africa nga gilarawang "in atrocious conditions with very unhygienic practices in hospitals". Nagnganga intawon ang akong mga kaubang nanan-aw sa ilang nasaksihang kondisyon sa ubang mga lugar sa gitawag "Horn of Africa" diin ang mga Douloids mitabang sa ilang mga igsoong kabos pinaagi sa usa ka hospital cleanup ug medical mission. Niining tungora giduyogan sa South African Choir ang maong multimedia show og usa ka kanta nga kinutlo gikan sa Pinadayag: Kapitulo 4 nga may ulohan "Awesome God in Heaven".

Usahay makamahay bitaw ko's ubang mga banda karon nga nanumaw ug nganong dili gyud sila magbuhat ug mga kantang maka-"uplift sa human spirit". Kana bitaw'ng kanta nga bisan pa man sa dagkong hampak sa mga suliran, makaengganyo pa sa mga katawhan nga padayong manikay-sikay. Mas pilion man gud aning ubang mga banda nga manaway sa kondisyones sa mga bayot kaysa dawaton ang ilang pagkamahuyang. Inay magsabwag og pagsabot, magtukmod na hinoon sa daan nang biased nga katilingban nga padayong lawgan ang ilang pagka-biased aron sa pagpatambok sa ilang prejudices. Fah etch! Ug inay morespetar sa mga tindera sa panaderya, tamay-tamayon naman lang ang baho sa ensaymada. Siguro kon naa pa'y choice nang tinderaha, dili gyud na siya maninda'g pan kay tamayon lang. Pinakapait ang tinamay ra sa'y motiwas ug tamay sa iyang isig katawo. Way alibyong nahatag sa mga suliran.

Vicious circle/cycle ang mahitabo kon ang mga banda wala'y gitamod nga Ginoo sa ilang kasingkasing, Manay Judith Sue. Padayon sa ilang prejudices ug pagka-judgmental. Unsa kaha'g guyoron ni nato sila sa andamyo sa M/V Doulos sa? O kaha papaminawon sa mga kanta sa South African band aron ma-seminar? Hee hee...Bitaw, nagdamgo gyud ko nga more Christian bands would go into mainstream. And make more songs nga makahikap sa mga kasingkasing sa mga tigpaminaw, aron mapalig-on pa'g samot ang ilang pakiglambigit sa Labaw'ng Makagagahum. Kon niining matanga sa musika ang direksyon sa mga banda, ang pagpalanog sa kabaghu-an dili na mistil pang isilsil, kay ang mata'g usa boluntaryong moiway susama'g Douloids alang sa pagpangalagad sa iyang isigkatawo.