'Sikwati' idalit ugma sa Agipo

"Usa ka agipo ang nakitang milagrosong nag-utaw-utaw nga wala mapalong o masubhi sa tubig-dagat. Sa dihang gidala kini sa mga mananagat sa mamala, takulahaw lang kuno kining nahimong imahen sa Balaang Bata."

Niadtong Hunyo 22, 2006, natagamtaman ning tagsulat ang kainit ug kalami sa sikwati nga ginama sa wala masambuging "cacao tabliya" nga gibubo kintahay ngadto sa usa ka basong sartin pinaagi'g CD sampler nga gitunol kanako ni Jorge "Bisoy" Tapales. Gikaluhaan ang maong kadasig ug kaikag sa pagpaambit sa iyang mga orihinal nga komposisyon ug pagsanong sa usa ka pakighinabi kauban ang lain pang upat ka mga sakop sa Bisrock band Agipo nga silang Ronie Bayabos sa bass, Dennis Raphael Moga sa drums, Joje Cleofas sa rhythms ug Algin John Tirol sa lead guitars.

Pito ka buwan ang tulin nga nangligad, ug ani-a na sila karon alang sa paghatag ug kalag sa kanhiay usa lamang ka pangandoy - ang paglusad sa ilang labing unang album nga giulohan ug "Sikwati" atol usab sa kasaulogan sa ilang unang tuig isip usa ka banda o ang kasumaran sa ilang pagkatukod isip Agipo.

"Niundang na gyud ko aning banda-banda sa una, but it is Bayabs (iyang tawag kang Ronie) who constantly encourages me to veer away from quitting. Mao to nga nanawagan mi sa 93.1 Smash FM on the need to recruit a guitarist and drummer para mi ma-porma," paglingi pa ni Bisoy sa yanong sinugdanan sa pagkatukod sa ilang banda atol sa gihimong acoustic Wednesday session sa tulumanong "BisrocKabataan" nga madungog Lunes, Miyerkules ug Biyernes alas 10 sa buntag ngadto na sa kaudtohon nga manganaw-kanaw sa sibyaanang dyWF Smash FM.

Ugma, ibubo sa Agipo diha sa Handuraw Events Café ang kinatibuk-an sa ilang paningkamot nga naghatag og gibug-aton sa ilang mga musikanhong mugna nga gihangop sa bagang duot sa mga Bisrockista. Magsugod ang rakrakan mga alas 7 sa gabii tungod kay 13 man ka mga banda ang mopasundayag sa dili pa mopatong sa plataporma ang Agipo. Mo-jam nila ang mga bandang Atsang Pidot, Kabobo, Fervent, Assembly Language, Abscond, What's The Frequency, Station Avenue, Them Bones, Indephums, Gangrene, Missing Filemon, 3Chordschoir ug Jaime. Mapalit ang ticket sa gate sa kantidad nga P80 nga may kauban nang libreng usa ka hiwang lamiang Handuraw pizza o kaha ice-cold beer (pili lang!).

Ang trese ka kanta sa "Sikwati" album naglangkob sa carrier track nga "Sikwati", "Batang Nangka" nga maoy paagi sa usa ka lumad nga taga San Fernando nga ilarawan ang usa ka "torpe"; ang romantisismo sa "Pag-sure Oi"; ang "Wish Ko Lang" nga nakig-ambit sa sentimentalidad sa "Mutya" ug "Pag-sure Oi" - nagpalanog sa romantikong kailhanan sa Agipo. Tinood nga nahimong susama'g paningog sa mga kanta sa Kamikazee ang kasagarang gihan-ay nga mga kanta sa Agipo. "This is because Kamikazee is one of our potent influences, aside from ska nga danceable," matud pa ni Bisoy. Kabahin usab sa album ang "anthemic" nga Kabataan Para sa Bisrak nga halad pasalamat alang sa di matabas-tabas nga suporta sa Kapabis Clan; ang makalingaw nga Nabitik sa Utot, ang kantang Luha nga gitagik nila sa pinulongang Filipino/Tagalog, ug ang laing tulo sa pinulongang Inglis sama sa Missing You, Brave New World ug Ode ('til Eternity).

Napili sa pundok ang pangalang Agipo tungod sa kainit niini. Gigamit sa Agipo isip metapora ang kainit, ang dagitab, ang gilaw sa baga sa tumoy sa usa ka kahoy tungod kay simbolo kini sa kainit nga buot nilang mabati, matagamtaman ug madimdim sa tanang nahigugma sa ilang mga kanta.

Gibatbat usab sa Agipo nga sumala pa sa gipasa-pasang mga sugilanon sa katiguwangan, usa ka agipo ang nakitang milagrosong nag-utaw-utaw nga wala mapalong o masubhi sa tubig-dagat. Sa dihang gidala kini sa mga mananagat sa mamala, takulahaw lang kuno kining nahimong imahen sa Milagrosong Bata - ang Señor Sto. Niño.

Bisan pa man og wala ni bisan usa sa pundok ang lumad nga taga lungsod sa Carmen, sa amihanang bahin sa Sugbu, ilang gilukdo ang maong pangalan isip pagtahud sa Sto. Niño kinsa milagrosong mikawas sa nagbagang kahoy ngadto sa pagkaporma nga imahen nga karon giludhan, gihalaran ug nahimong sentro sa pangilaba. Hinungdan man gani nga ang Carmen maoy giilang labing unang nagtamod sa sayaw-ritwal nga "sinug" alang sa kahimayaan sa Balaang Bata.

Ang maong album launching ugma ihatod kanato sa maayong kabubut-on sa Pine-Box Production, GraphicStar (Reaching Out Beyond Imagination), BSU Clothing, dyWF - 93.1 Smash FM, Handuraw Events Café, ug ning mantalaan. Suroya ang www.myspace.com/agipo and www.friendster.com/agipomusic. Mga CDs nga balor og P150 mata'g usa ug lain pang merchandise/items ipamaligya sa entrance ugma atol sa himoong paglusad.