Ang "Bisrock Rakrakan para sa Nagkinahanglan" anha mahitabo sa Talisay Community Gym karong Sabado, Enero 27, sa alas 7 sa gabii. Tag-P30 lang ang ticket, available at the gates.
Tumong ning maong kalihokan ang pag-abag kang Gil "Choy" Truya, ang kapuling pangulo sa Deadspotters Society nga nahilandig sa tambalanan gumikan sa usa ka matang sa virus nga naka-apekto ug dako sa pag-function sa iyang kasingkasing hinungdan sa paghubag niini. Gani, ni-komplikar ang maong balatian ngadto sa iyang pulmon, hinungdan nga mitumaw usab ang broncho pneumonia. Gidala sa tambalanan si Choy niadtong Disyembre, pipila ka adlaw padulong sa nagdanga-danga nilang Christmas party sa DSS nga ila untang pagahimoon sa Seminario Mayor de San Carlos.
"Nigawas si Choy sa balay tambalanan kay kon magpabilin siya didto mosamot man kadako ang hospital bills. Under medication siya karon," pagkonpirmar ni Aileen "Ai-Ai" Panoy, usa sa mga sakop sa Deadspotters Society, usa sa mga grupong todo ang gipakitang suporta atol sa nakalabay'ng duha na ka Rakrakan nga gipasiugdahan sa Smash. Kon natiman-an, unang nag-rakrakan niadtong Septiyembre 27, 2006 alang sa 39th anniversary sa dyLA. Ug bisan pa man sa hulga sa panahon tungod sa bagyong Milenyo, napuno gihapon ang ALU-Vimcontu compound. Nausban kini niadtong Huwebes, kay bisan pa man og nagkalata ang mga concerts ug related events dinhi sa Sugbu, dul-an sa kwatro mil ka tawo ang nisaksi sa maong linawas nga pasundayag - ang binuakay sa paningog nga Bisrock sa 17 ka mga banda.
Sa ipahigayong rakrakan alang sa nanginahanglan, ang mga mipasalig nga mogahin sa ilang panahon alang sa paglingaw sa mga Bisrockers sa Talisay mao ang mga bandang D' Kazins, Wet Slippers, Agadiers, Assembly Language, Stonestomp, Retdem, 3chordschoir, Session of the Fighters, Station Avenue, ug ang Makadawa kansang duha ka sakop nga silang Jun Abasanta (drummer) ug Jay Abasanta (gitarista) mga taga Cansojong, Talisay City.
"Owing to its lesser exposure to Bisrock events, Talisay has been chosen to be the location of the concert," mao kini ang giluwatang pamahayag sa organizer nga gipangulohan ni Charlton "Tonton" Miparanum, ang gitarista sa Phylum, ug sa album graphic designer sa Phylum nga si Roel "Mcwhelz" Rosario pinaagi'g press statement.
Hinaut pa unta todo na sad ang suportang ihatag sa mga Bisrockista alang ning maong katuyoan. Dul-an sa P110,000 ang gikinahanglan karon ni Choy alang sa medications ug bayad sa mga ekipong gigamit alang sa paghiling, pagtambal ug paglugway sa iyang kinabuhi. Ug lain pang dul-an sa P40,000 nga bayranan alang sa serbisyo sa tulo ka doktor nga nag-atiman kaniya. Dili lalim kining maong kahimtang karon ni Choy nga may gimulo pa's iyang kasingkasing nya nagpas-an pa's hunahunaonon kon sa unsang paagiha makatigom sa maong kantidad.
Main objectives sa maong concert for a cause ang "to help settle the monetary liabilities of the recipient to the hospital, to encourage appreciation of Bisrock music from non-followers and capture new markets, as well as to provide exposure to some Bisrock bands."
Mamarayeg kita sa mga Bisrockers ning panahon nga magkinahanglan kitang makatigom aron matagad kining usa ka proyekto o buhat sa kalooy. Nasayud kita nga album launching usab sa Agipo karong Sabado diha sa Handuraw Events Café. Gitunong nila ang maong paglusad sa ilang 13-track album nga may ulohang "Sikwati" atol sa ilang unang anibersaryo isip usa ka banda. Hinaut pa nga dili makalimtan sa mga taga-Talisay nga fans sa Agipo nga aduna'y buot makab-ot ang maong rakrakan sa Talisay Community Gym karon usab nga Sabado.
Dili lang tuyo nga mo-headbang, sadsad, ug stagedive, ang rakrakan sa Talisay usa usab ka benefit concert. Ning tungora usa ka fan ang nanginahanglang suportahan sa iyang mga idolo. Ayaw pakyasa kining usa ka pamarayeg nga unta maabagan ang usa ka nagmasakitong Bisrockista.