Ang tv series theme song queen

Mga Manash, himamata sad ang laing Bisdak nga gikaistorya pod namo one hour after sa among pagpakig-kulukadidang sa cast sa "Amor-Chicko" didto sa mao gihapong venue, Entertainment Plaza sa SM City, ang laing workaholic nga Bisdak as in, natawo sa lungsod sa mga chicharon ug mga sapatos nga lig-on, si Sheryn Regis [Sheryn Regis ha, dili Sherilyn Reyes, kay si Sherilyn Reyes, kadtong former Mutya Ng Pilipinas diha ra man magpuyo sa Access Road sa Ayala ug actress comedienne man, naa ra bay kanunay'ng masayop], ang taga Carcar nga sama ni Dulce, kanunay sad kunong giyam-iran sa mga tambay, pero karon, gitawag na sa Manila og TV Series Theme Song Queen, kay siya man kono'y gakanta sa mga theme song sa daghan kaayong mga TV series karon sama sa, bag-ong gi-revive nga "Maria Flordeluna".

Mianhi sad si Sheryn bisan sa ka-hectic sa iyang schedule, kay matud niya, kinahanglan gyod nga mag-promote siya sa bag-o niyang album nga "Modern Jukebox Collection."Dili gyod kono mahimo nga makontento lang nga nahuman na ang maong album.

Kinahanglan himamaton niya ang "prospective buyers" sa maong album. Pero bisan pa kono'g mohalin ang bag-o niyang album, diin duna siya'y composition nga nag-ulohan og "Pusong Lito" dili gyod siya mohunong pagpanghimo og kanta. Gawas pa niini, kun makalugar na siya, moapil na gyod siya og mga teleserye or, movie.

Gani, ganahan sad gyod unta siyang modawat sa tanyag ni direk Al Evangelio alang sa umaabot nga "Kalbaryo sa V. Rama" para karong umaabot nga Abril, kay usa man siya sa original cast niini sa Cebu-based pa siya. Gani, siya sad ang original nga Bulakna sa unang "Kadaugan sa Mactan" ug original lead star sa "Calamba Joe". Ugaling lang, kay naglisod gyod siya sa pagtugot sa Star Records tungod sad lagi sa daghan na kaayong mga commitments sa Star Records para niya, kay may schedule na man pod siyang show sa laing nasud sa umaabot gyod nga Abril.