Mas hugyaw nga Cebu Pop

Gipaabot nga maghugop na usab diha sa Cebu Coliseum ang mga mahiligon sa musikang binisaya karong gabii alang sa mabulokon na usab nga pagpahigayon sa nabantog na kaayong Cebu Popular Music Festival nga anaa na sa iyang ika-27 ka tuig.

Ang Cebu Pop namugna isip halad sa Balaang Bata nga si Senyor Sto. Niño ug sa samang higayon paagi aron pagpalambo sa Cebuano/Visayan music industry.

Matud pa ni festival executive project director Philogene Florita, 12 na usab ka mga bag-ong komposisyon ang magtigi alang sa titulo nga daghan nang mga katuigan nahimong "jumping board" sa Sugbuanong mag-aawit nga naila na karon sa kauluhan.

Mapasigarbohong gipahibawo ni Florita nga mas hugyaw ang masaksihan nga Cebu Pop karong gabii sanglit nagkadaiya ang mga matang sa kanta nga maoy mag-ilog sa grand prize - duna'y pop jazz, bossanova, broadway style, love songs ug uban pa.

Usa sa mga entry mao ang kantang "Sabong" diin naila ang mga Pinoy ilabi na ang mga Sugbuanon sa hilig sa pagsabong.

Laing kanta mao ang "Pobreng Ilusyonista" diin kasagarang mga kabos nag-ilusyon nga makab-ot ang mga pangandoy sa kinabuhi.

Naglangkub sa 12 finalists mao ang - Bisan Anino Lang, Lihok Kabataan, Pahimangno ni Nanay, Kalandrakas, Buhing Pangandoy, Ikaw Unta, Kausaban, Puno sa Gugma, Sugbuanon Ako ug Bakho sa Angel.

"We are honoring Visayan industry here and in honor of the Señor Sto. Niño," pong pa ni Florita.

Karong tuiga aduna usay texter's choice award diin gusto sa mga organizers makuha ang sentimento sa publiko, kinsa ang paborito nila nga entry. Apan ang maong award wala'y kalabotan sa contest criteria.

Ang first prize sa maong pasundayag makakuha og P150,000; P100,000 sa second place samtang P50,000 sa third place.

Ang tanang finalist sa Cebu pop music makadawat usab og P15,000 samtang ang texter's choice award makadawat of P10,000.

Kinsay mosunod sa mga tunob nila ni Sheryn Regis, Anna Fegi, Raki Vega, Vina Morales, Dulce ug uban pa? Kana mahibaw-an karong alas otso sa gabii.