Hagit ni Patrick wala tagda ni Mark

Gihagit ni Patrick Garcia og sumbagay si Mark Herras human masayud ang nahauna nga dunay dili maayong pagsinabtanay ang naulahi ug si Jennylyn Mercado.

Ang tsika sa PangMasa mao nga human masayod si Patrick nga nagkadiperensyahay sila si Mark ug Jen sa ilang panaghigalaay, dali nga mitext si Patrick ngadto ni Mark ug nanghagit og sumbagay.

Dugang pa nga dihang wala motubag si Mark sa text, sunod nga gipangayo niini mao ang home address sa nahisgutan.

Gipaabot na sa mga himantayon nga ihimakak nila ni Jen ug Patrick ang maong taho, apan si Mark makapamatuod niini sanglit iyang gi-save ang text ni Patrick.

Si Jen ug Patrick nga miangkon nga sila na, maoy loveteam usab sa umaabot nga project sa GMA-7, ang Super Twins diin apil usab sila si Nadine Samonte ug Dennis Trillo.

Sa Pebrero 12 mag-pilot episode ang maong fantaserye samtang si Mark nga miingong dili na siya makigbalik pa ni Jen, apil usab sa Princess Charming nga magsugod sa katapusang semana niining buwana.