Kadangyan: Tribal rock ang idalit nga sinugatan

Nasipyat ko pag-encode sa petsa sa pasundayag sa Kadangyan diha sa Elizabeth Mall. Inay Enero 13, na-encode nako ang petsa og 12 sa hulad sa The FREEMAN Entertainment niadtong Martes, Enero 9. Mangayo ko'g despensa sa organizer sa maong event. Ang skedyul alang sa E-Mall nga gig karon gyu'ng Enero 13, alas dos sa kahaponon sa Street Level, 3rd floor alang sa Music & Fashion nga affair.

Ang Kadangyan, gianggaan og "godfather of ethno-tribal music", nanguli na alang sa sunod-sunod nga mga pasundayag dinhi sa Sugbo atol sa tinuig nga pangilin sa Milagrosong Balaang Bata (Señor Sto. Niño de Cebu) sa dili pa ang pundok molarga ngadto sa Miami, Florida, sa Tinipong Bansa sa Amerika alang sa International Mantra World Music Festival.

"Bisan dili tanang sakop sa Kadangyan lumad nga taga Sugbo, sa pagkatinooray lang gyud ganahan gyud mi diri. Nangadto mi'g Manila just to let them know nga we are greater than them in all sorts," pu'ng pa ni Jean Marquesto aka John Govinda (lumad nga taga Iligan City), ang back-up vocals sa Kadangyan nga mao usab ang mopatingog sa mga tulonggong bidjang, kubing, budjong ug water chimes, kinsa nitawag sa mga Sugboanon isip iyang "ikaduhang banay."

Nanimpalad ang Kadangyan sa Manila aron pangitaon ang ilang luna sa mainstream music agi'g pagpalanog sa world/tribal music niadtong ikaduhang hugna sa nakalabay'ng tuig. Ug tuod man, wala sila napakyas kay inabagan ni Ms. Ann Angala isip manager dako na og kalamboan kon pagpanglipang ang ilang career. Karon miuli sila nga dala ang usa ka sinugatan - ang ilang transisyon ngadto sa usa ka pundok sa mga tribal nga rockista.

Ang mga sakop niini nga sila'ng Bhava Mitra (lumad nga Igorot) isip vocalista, ug nipatingog sa mga tulonggong mityapi, acoustic guitar, native flute ug kubing; si Agit nga taga-Samar sa bass ug lain pang percussions; si Elak nga taga-Carcar sa drums, tukatok ug lain pang percussions (nga pulihan na ni Zaryo de los Reyes puhon); Bhakta nga usa usab ka Sugbuanon sa tulonggong gabang (bamboo xylophone) ug djembe, nga mao usab ang back-up vocals; kauban si Govinda nagbitbit sa sinugatang proyektong kultural nga may ulohang "Las Islas de los Pintados" - ang ilang ikaduhang album nga tribal rock ang paningog, apan pinakaunang album nga iapod-apod sa tibuok nasud ubos sa major label.

Sulod sa maong album ang napulo ka kanta nga akong pagahimay-himayon ang mga unod sa laing artikulo puhon, kana kon andam na ang tanan alang sa paglusad sa "Las Islas de los Pintados" (Mga Pulo sa mga Patikan).

Gipasalig sa Kadangyan nga ang mga kanta sa tribal rock nga genre magduso lang gihapon sa ilang misyon ug direksyon - "reviving and evolving the vanishing Philippine culture, promote appreciation for Philippine ethnic music, promote moral and drug-free music, promote environmental concerns and humanism, and support universalism and peace," batbat ni Govinda.

"Kami sa Kadangyan nalipay kaayo sa gipakitang pagbarog aning mga bandang Bisaya labi na gyud kaning mga Bisrock. Ang sinultihan nga Bisaya mao na lang ang nahibilin nga nagkutay nato ngadto sa mga matuod natong mga katiguwangan," pagpahimug-at ni Govinda atol sa usa ka pagpakighinabi.

Giamuma karon ang Kadangyan sa mga maayong kamot ni Angala, kinsa maoy kanhi manager sa Pinoy alternative rock bands Eraserheads ug The Dawn. Atangi ang Kadangyan karong gabii sa Handuraw alang sa paglusad sa Dunhill cigarette event, ug sa petsa 20 sa Robinson's kauban ang laing Bisdak apan Manila-based band Mano-Mano. Sa Abril 22, ilusad sa Kadangyan ang ilang full-length album "Las Islas de los Pintados" nga may kalabotan sa arte sa pagpamatik isip kabilin-biling matang sa arte sa atong mga katiguwangang Malayo nga maoy nagpalig-on sa pundasyon sa body art ug tattooing. Sa Pebrero, ang DVD format sa gig and interviews compilation sa Kadangyan, labi na gyud kadtong diha sa Handuraw diin sila magkanunayan, iapod-apod usab. Ang album launch unang mahitabo sa kaulohan apan gipasabot ni Govinda nga duna'y mahitabong mga tours sa nagkadaiyang dagkong dakbayan sa tibuok nasud alang sa pag-promote sa maong album.

Kining tanan mahitabo human sa invitational gig sa Miami, Florida gikan Pebrero 9 hangtod 11 alang sa International Mantra World Music Festival.

Sidetrip sa www.kadangyan.com.ph alang sa uban pang mga impormasyon may kalabotan kining banda nga gianggaan og "godfather of local ethno-tribal music."