Nikki mi-back out

Mi-back out si Nikki Taylor sa Miss Cebu beauty pageant, sa susamang adlaw human napatik dinhi sa Banat Hugyaw ang taho kalabot sa mitumaw nga balita nga dili pa siya 18-anyos.

Apan hangtud alas siete kagabii walay opisyal nga pamahayag nga giluwatan ang iyang kampo kalabot sa tinood nga rason sa iyang pag-atras gikan sa nahisgutan nga indigay.

Una niini, dunay presscon nga gitakda ang iyang kampo, alas 4:30 kagahapon apan kalit lamang kining gi-cancel sa wala pa matino nga hinungdan. Ang manager/agent ni Nikki nga si Marlon Wafer nagdumili usab paghatag og higayon nga mahinabi si Nikki kun wala sila sa palibot.

Ang chairperson sa Miss Cebu, fashion csar Philip Rodriguez dihang gipangayuan og pamahayag sa mga tigbalita niadtong Martes sa gabii diha sa Fuente Osmeña nganong wala si Nikki atol sa maong fashion show ug pre-pageant, igo ra nga miingon nga andam na si Nikki alang sa maong indigay sunod tuig.

Una niini gipatawag sa Miss Cebu Commissioners ang past winners nga sila si Melanie Ediza ug Karla Bautista lakip na ang kasamtangang rayna nga si Stephanie Señeres aron pangayuan og katin-awan kalabot sa taho nga ilang gikomprontasi si Nikki niadtong Sabado sa gabii kabahin sa iyang tinood nga edad.

Suma pa nga niadtong tungora miangkon si Nikki nga 17-anyos pa siya. Dungan niini, ang nahisgutang mga beauty queens miduso usab og suwat-hangyo ngadto sa komisyon aron tan-awon ang mga pagduda kalabot sa tinood nga edad ni Nikki.

Human sa maong panagtagbo, sunod nga gipatawag mao ang kampo na usab ni Nikki diin matud pa gimanduan siya pagduso og suwat nga magmatuod nga 18-anyos na siya.

Apan dako na lamang ang kahibulong sa ubang mga kandidata dihang wala na si Nikki motunga alang sa fashion show diha sa Fuente.

Samtang atol sa nahisgutang fashion show ug pre-pageant gihatag na usab ang pipila ka minor awards ngadto sa mga nagpakadaug nga kandidata. Miss Smart Communications si Joan Uy, si Carlisle Santos maoy Miss Renew Placenta, best in fun wear si Ruby Guinto ug best designer in fun wear si Ivan Belacura diin ang iyang creation gisul-ob ni Louise Angelique Tan.

Ang Miss Cebu 2007 coronation night ipahigayon diha sa Grand Ballroom sa Waterfront Lahug, ugma puhon sa alas otso sa gabii diin ang bantugang TV host nga si Boy Abunda ang host kauban usab si Paulo Trillo. Ang kasamtangang Miss Universe nga si Zuleyka Rivera gipaabot usab nga usa sa mga hurado.