Apan subling naugkat ang maong intriga niadtong Sabado sa gabii human sa fashion show nga gipahigayon didto sa Malacañang sa Sugbu diin didto usab ang 12 ka mga kandidata sa Miss Cebu. Ang taho nga nahipos sa Banat Hugyaw kagahapon mao nga mismong ang kanhi mga Miss Cebu winners nga sila si Melanie Ediza ug Karla Bautista ingon man ang kasamtangang rayna nga si Stephanie Señeres maoy mikomprontasi ni Taylor kalabot sa mga huhungihong.
Suma pa sa tinubdan sa Banat Hugyaw nga diretsong gipangutana sa nahisgutang mga beauty queens si Taylor, "when is your birthday?" Suma pa nga gitubag kini sa nahisgutan og "I'm already 18 last January 25, 2006." Tungod niini ang sunod nga pangutana ni Ediza mao nga " how can you be 18 when, when I judged you sa Miss Teen Philippines you were only about 12 or 13, bag-o pa man to? Unya bag-o pa ka ni-graduate og high school."
Dinhi niining bahina gikatahong miangkon si Taylor nga 17-anyos pa siya ug giingnan lamang siya sa mga tawo nga nagpalibot niya nga ipadayon ang pag-apil sanglit matud pa dili ra kini mahibaw-an.
Si Señeres nga gikuhaan og pamahayag kalabot sa taho miangkon nga ilang diretso nga gipangutana si Taylor kabahin sa mga tabi-tabi nga ilang nadunggan. " If ever namakak siya or wala at least ni-admit siya nga dili pa siya 18. Ang amo lang we wanted to protect her integrity and the integrity of the crown," pasabot ni Señeres.
Dihang gipangayuan og reaksyon kalabot sa maong isyu tubag niya, " it's so sad, she is very talented. But that's why we have rules, we have qualifications. It's gonna be unfair to the other candidates if tinood na."
Gipaabot nga muduso og suwat sila si Ediza, Bautista ug Señeres ngadto sa buhatan sa Cebu City Tourism Commission karong adlawa aron pormal nga mohangyo nga tun-an o lilion ang maong taho.
Ang fashion czar nga si Philip Rodriguez, Vice Chairman sa Screening Committee ug Chairperson sa Production Committee sa interview sa Banat Hugyaw kagahapon miingon nga nakadungog na siya sa gikatahong komprontasi apan nagdumili paghatag og dugang detalye sanglit wala pa niya hingpit nga natugkad ang tinood nga nahitabo.
Gibutyag ni Rodriguez nga gitakda nga magtagbo karong adlawa ang mga nalambigit nga personalidad nga sila si Ediza, Bautista, Señeres ug Taylor kauban ni Vice Mayor Michael Rama aron tukion ang maong isyu sa ingon mahatagan og tukmang aksyon.
Dungan niini ang manager/agent ni Taylor nga si Marlon Wafer miingon nga wala siya masayod sa maong hitabo busa dili una siya mokomento.
Samtang karong gabii gitakda nga pormal na nga ipaila ngadto sa publiko ang 12 ka mga kandidata sa Miss Cebu kauban ang Top Young Designers sa Sugbu, sa alas nuwebe diha sa Fuente Osmeña oval.
Niining tungora pasidunggan usab ang Miss Smart Communications, best in fun wear ug best designer in fun wear. - Ryan Mark uban sa taho ni Marigold Lebumfacil