Dili puwede ang mga Pinoy

Mga pila ka adlaw sa wa pa moabot ang Pasko, nagdapit si Roda Gonzales para sa opening sa Tony And Jackie Hair Salon nga gipanag-iya sa usa ka Koreanong expert hair stylist, si Joung Park. Unya, basta si Mam Roda ang mag-ivite, mokurog man gyod ko, bisa'g dili pang-showbiz, gikuyog gyod nako ang news director sa Bullet Headline (now, anchored ably by Manny delos Santos Rabacal) nga si Arnel Dada pagka ugma sa hapon.

Ang nag-cut sa ceremonial ribbon mao sila si Vice Mayor Michael Rama ug businessman Robert Go, kauban ang tag-iya nga si Ms. Park, ug igsoon nga si Sky Park. Miingon si Miss Joung Park nga mopauli una siya sa Korea ug dugay pa siyang mobalik dinhi, busa ang salon iyang gisalig sa iyang igsoon nga si Sky nga naminyo og usa ka maestrang Cebuano. Midugang sa pagpahibawo sila si Sky ug Joung Park nga ang asawa ni Sky dili manginlabot sa maong salon, ug labot pa, wa gyod kono'y Pilipino nga hairstylist nga makatrabaho sa parlor ug pulos ra gyod mga Koreana. Kun duna man gani Cebuano nga makita sa maong salon, kini sila ra gyod mga assistants.

Hinoon, nagkuha pod sila og mga artistang endorser, ug ang labing una nilang endorser way lain kon dili ang maanyag pod nga actress-model nga si Iza Calzado. Gawas sa pagpanglabay og mga coins, mi-demonstrate si Miss Joung Park unsaon pagpanindot sa buhok ug ang gihimo niyang mga models mao sila si Vice Mayor Michael Rama ug negosyanteng si Robert Go nga siyempre, misamot ka gwapo nga mora sad og mga artista.