Bidlisiw sa inspirasyon

"Inspirational diva" sa Sugbu. Kini maoy titulo nga gihatag sa tagduma sa Soundtraxx Recording Studio ngadto ni Japril Yap, ang interpreter sa grand prize winner sa unang Huniño (Halad Alang Kang Señor Sto. Niño de Cebu), Songwriting Competition. Apan kun si Japril ang pangayuan og reaksyon kalabot niini, igo lamang siya nga mokatawa dayong ingon nga "I'm flattered, thank you kaayo."

Dili man tuod siya maoy migawas nga best interpreter atol sa grand finals diha sa Pilgrim Center sa basilica niadtong Miyerkules sa gabii apan malipayon siya sanglit ang ilang kanta maoy midaug. Suma pa niya dako na kaayo niyang dungog nga pinaagi sa kanta, napadayag niya ang iyang gibati alang ngadto sa Balaang Bata nga si Señor Sto. Niño. Sa interview sa OkRyan (dyLA 909khz, 3-4pm Monday to Friday), giangkon ni Japril nga dili siya relihiyosa nga pagkatawo apan dako ang iyang pagsalig sa Ginoo.

Unang nakasabot nga duna siya'y talento sa pagkanta sa pangidaron nga kwatro anyos, si Japril bag-ong bitoon sa nagkataas na nga listahan sa mga talento nga naggikan sa dakbayan sa Toledo. Lumad nga taga Lutopan sa maong syudad, gibutyag niya nga dihay higayon nga nagkakontra sila ni Jimmy Marquez, nga paryente ra usab niya. Niadtong Miyerkules, laing taga Toledo usab ang iyang katigi, si Robert Bernadas nga nasulod sa Top 24 sa bag-o pa lamang nahuman nga Philippine Idol sa ABC-21. Apan wala maghuna-huna og kompetisyon si Japril tungod kay ang mga nahisgutan giisip niya nga mga "kuya."

Tinun-an sa kursong Banking and Finance sa University of San Jose Recoletos, si Japril nagtungha nga libre sanglit usa siya karon sa lig-on nga pambato sa nabantog na kaayo nga USJ-R Dramatics and Cultural Ensemble. Nadiskubre siya dihang siya maoy migawas nga mananaug sa Words of Music, tinuig nga kompetisyon nga ipahigayon diha sa maong tunghaan diin pangitaon ang labing maayo mokanta, mosayaw, mamaba ug mo-arte. Tuig 2005 siya midaug sa nahisgutang bangga hinungdan nga paborito na siya sa iyang mga higala sa USJ-R isip performer sanglit dako ug bugnaw ang iyang tingog nga sigurado gayud nga motawag og atensyon aron siya imong paminawon.

Maoy hinungdan nga gidasig siya sa iyang mga higala pagpanimpad usab sa Philippine Idol. " Wala man gyud koy plano ato, unya maikog man ko sa akong mga amiga kay sila man gyuy mikuha og application para nako mao nga misuway ko, kalooy sa Ginoo nadala gyud ko sa Top 80. Pagkatangtang nako sakit sad baya pero akong giingnan akong kaugalingon nga naa pay giandam nga lain para nako," saysay pa niya sa OkRyan.

Kung unsang pagka-unsaa nga siya maoy nahimong interpreter sa midaug nga huni alang ni Sto. Niño, alegre usab nga istorya nga angayang balikan. Asoy pa niya, ang iyang maestro sa USJ-R maoy nagpaila niya ngadto sa composer nga si Renato Sagayno niadtong Mayo. Niadtong higayona nagkinahanglan og singer si Sagayno aron maoy mo-interpret sa iyang komposisyon alang sa bangga usab sa mga awit alang sa Birhern sa Fatima sa Fatima Parish sa Basak Mandaue. Duha ra ka oras ang iyang ensayo ug nag-recording na gilayon siya alang sa demo CD. Pilay istorya siya ug ang kanta ni Sagayno maoy milangkat sa unang dapit. Busa naturalmente siya maoy subling gipakanta ni Sagayno sa nagmadaugon nga komposisyon "O Señor Santo Niño" niadtong Miyerkules. Matud ni Japril, pagbasa pa lamang niya sa lyrics lahi ang iyang paminaw nga daw dunay pwersa nga nagtukmod kaniya aron iya kining awiton. Hinungdan nga misugot siya dayon.

Apan medyo gikuyawan si Sagayno sa performance ni Japril sanglit duha ka adlaw sa wala pa ang grand finals, nabag-ohan man siya sa duyog sanglit naandan niya nga piano ang moduyog kanunay sa matag praktis niya samtang niadtong Miyerkules ang Huniño Chamber Orchestra na. "Nakuyawan ko, pero paggawas nako sa stage kay gaan naman kaayo akong paminaw, murag prayer na to nako para sa Sto. Niño. Giingnan man sad ko nila nga dili maghuna-huna og dautan," tug-an ni Japril ngadto sa Cebu Press human sa awarding.

Dungan niini gibutyag sab niya ang iyang sekreto. "Gibutangan nako og piso ang akong tuo nga tiil, gisulod sa akong sapatos. Ambot sa una pa man na nako buhaton kay mao man nay ingon sa akong mama," tug-an niya nga mapahiyomon.

Lahi usab siya sa kasagarang singer kun dedikasyon na ang hisgutan. " Every night mag-practice gyud ko from 7-10pm. Makahurot ko og 20 songs, klase klase nana from pop to inspirational songs, bahalag bati o baduy nga song kantahon nako. Moinom sad kog bugnaw," paambit pa niya.

Pangandoy ni Japril nga masulod sa showbiz ug mahisama sa iyang mga idolo nga sila si Barbra Streissand, Mariah Carey, Martin Nievera ug Lea Salonga. Apan unya na niya gukdon ang katumanan sa maong pangandoy sanglit buot niya makatapos una sa pagtuon ug mahisama sa iyang mga iyaan nga mga negosyante. "Lahi ra gyud kung makahuman ka og eskuyla kay dili gyud ka i-look down," panapos pa niya.