Pagmugna sa kasaysayan

Bisan pa man sa pagbunok sa uwan, mabulukon ug malampuson nga napahigayon ang labing una nga Huniño-Huni Alang Kang Santo Niño de Cebu Songwriting Competition sa Pilgrim Center sa Basilica niadtong Miyerkules sa gabii. Dose ka mga bag-o ug orihinal nga komposisyon gikan sa 122 ka entries nga gipilian ang nagtigi aron mahimong tipik ug kabahin sa kasaysayan isip labing unang mananaug sa nahisgutang indigay.

Una niini maoy miabli sa grand finals night ang nabantog na nga San Diego Dance Company. Niining mga gutloa samtang nag-"sinug" ang grupo mitaligsik apan nawala ra usab dayon. Dangtan og pipila ka minutos mibundak ang uwan dihang ikaupat na nga entry ang giawit sa interpreter niini. Apan wala matarog ang bagang duot sa katawhan, pabilin silang nagpunsisok bahala na og nangabasa ang kasagaran kanila. Sanglit dili ordinaryo nga panagpundok ang nahitabo kun dili espesyal nga paagi pagsimba ug pagsaulog ingon man pagpasidungog sa Balaanong Bata nga si Señor Sto. Niño.

Hudyaka, singgit sa pagdayeg ug pasalamat maoy naghari niadtong mga gutloa, malanog nga pakpak ug abiba ang madungog sa palibot samtang ang mananoy nga tingog sa interpreter nga mikanta sa ilang mga pag-ampo nakigtigi ug nagpasulabi kaysa bunok sa uwan. Human sa kapin tulo ka oras nga bangga migawas nga mananaug ang kantang "O Senyor Santo Niño" ni Renato Sagayno ug gi-interpret ni Japril Yap. Sila nakadawat og P50,000 cash ug laing P5,000 isip finalist, plus maanindot nga imahen ni Señor Santo Niño. Ang paspas ug alegre nga kantang "Himayaon Ka Sto. Niño" maoy nakaangkon sa ikaduhang dapit nga sinuwat ni Norman Jabonero nga gihatagan og kinabuhi sa grupong Revelation. Sila nakadawat og P35,000 cash samtang ang ikatulo nga dapit gilangkat sa awit nga "O Holy Child" ni Jay-arr Librando ug gi-interpret nila ni Reston Sinineng ug Rhine Rose Echivarri. Mikabat usab og P35,000 ang salapi nga ilang nahipos sanglit sila man usab ang midaog isip best interpreter.

Ang ubang mga entries nga maoy molangkub sa CD compilation album mao ang Sto. Niño nga Milagroso composed by Roy Tabasa, gisuwat ni Gwendolyn Cresencio ug ang interpreter mao si Robert Bernadas, O Santos nga Dios nga sinuwat ug gikanta ni Nida Orio, O Miraculous Sto. Niño ni Eugene Tan ug gi-interpret sa For the Lord Choir, Sto. Niño,Tabangi Panalipdi ang Sugbo, sinuwat ug gikanta ni Manolito Languido, Yukboan ug Pasidunggan, nila ni Rommel Ambi ug Fr. Jed Billones, To be a child like ni Ogie Melgar, Hiyas ni Sto. Niño, nila ni Flordeliz ug Melchor Gilig, Sto. Niño Kami Panalipdi ni Emmanuel Abellana ug Sto. Niño, Our hope for peace nila ni Russel Alegado ug Janice Warnack.

Samtang si Crystal Voice of Asia Sheryn Regis gihugyawan usab sa tulo niya ka mga kanta lakip na niini ang "Sto. Niño Among Gabayan" nga nalakip sa iyang debut album kaniadto. Tiunay nga deboto ni Sto. Niño, suma pa ni Sheryn nga ang Balaang Bata maoy responsabli sa tanang grasya nga iyang nadawat, ug tungod niini kanunay siyang mapasalamaton.