Silang mga kutiban og baba

Matag adlaw nga molabay, nagkadaiya'ng mga tingog nga giduyugan sa mga maanindot nga musika ang milanog sa kahanginan nga daw mopukaw, moagni, molingaw ug mo- duyan-duyan kanato hangtod na ngadto sa atong paghikatulog. Pipila na usab ka buwan ang milabay diin inanay natong giablihan ang ilang kaugalingong kalibutan, dinhi sa Banat Hugyaw Jamming, ang mga inilang DJs o disc jockeys dinhi sa Sugbo atong nahimamat, atong nakauban. Ang mga bantugan nga mga personalidad nga nagpaluyo sa tingog nga atong madunggan sa radyo nga minghangop ug mihatag usab og inspirasyon sa kadaghanan.

Karon, sa pagsubang sa bag-ong tuig, ato usa'ng balikon sa pagtan-aw ang pipila sa mga disc jockeys sa dakbayan nga dili namo malimtan human usab namo sila nahinabi, nahibalag ug nakauban bisan sa hamubong panahon.

1. Papa Joe sa 99.5 RT Nindota Ah! (Norenito Joelon Edison Pelomiana) - Siya naila usab isip Joelon d' Hitman. Apan karon mas lanog ang ngalan nga "Papa Joe" sa iyang programa nga "Talk to Papa."

Dise-otso anyos pa lang, nagkugi na siya pagkab-ot sa iyang gustong buhaton, ang magsibya sa kahanginan ug mahisulod sa kalibutan sa kalingawan. Gani, duha ka tuig siyang naningkamot ug nagpasensya aron lang mahisulod sa nahisgutang istasyonan diin siya, hangtod karon, nahimutang. Daghan pa siyang naagian nga tunok una siya nahisulod sa kalibutan nga gusto niyang makab-ot. Hinuon, sa gidugayon sa iyang kakugi ug pagmahal sa trabaho, siya ang gihimong program director sukad niadto'ng milabay nga tuig. Sa laing bahin, wala usab siya nagduha-duha sa pagbutyag kanamo sa iyang pribado nga kinabuhi - nga siya divorced sa iyang half-American nga asawa ug siya ang nag-amuma karon sa iyang duha ka babaye nga anak.

2. Ryk Orion sa Monster Radio BT 105.9 (Mark Pabiloña) - Siya naila sa katawhan tungod sa nagkalain-laing mga butang nga iyang gipauso sa kahanginan. Si Ryk Orion ang una'ng nagpauso anang "talk show" sa kahanginan ug hangtod karon iya gihapon kining giulohan sa iyang programa'ng "Dawghaws" sa nahisgutang istasyon diin siya ang program director. Dugang pa niana mao ang mga pulong nga iya usab nga gipauso, sama sa "southside" ug "fingerplay" o texting. Tuod man, sa uban matawag man siya nga bastos apan sa atong pag-ilaila kaniya, atong nabatyagan nga siya manggiuwawon. Gani, para sa iyaha matawag usab siya nga introvert pagkatawo tungod kay daghan siyang buot buhaton apan dili niya mapadayag tungod sa kauwaw. Gawas niana, si RYk Orion usa usab ka mapahiubsanon nga tawo. Hangtod karon iya gihapon i-record ang iyang mga programa ug sa matag buwan paminawon aron iyang mahibaw-an unsa pa ang iyang angay nga palambuon.

3. Louie Tsunami sa 95.5 Star FM (Ernesto Yap Jr.) - Sukwahi sa mga nauna, ni sa damgo wala gyud misanting sa iyang hunahuna nga usa ka adlaw siya usab paminawon sa katawhan diha sa kahanginan. Kini tungod kay ang iyang hilig ug kurso'ng nahuman, mag-uma man. Apan, tukmod usab sa kapalaran, tungod sa panginahanglanong pinansiyal, aksidente siyang nahimong DJ. Aksidente lang tungod kay sa kadaghanan nga iyang gi-applyan nga trabaho, sa Star FM Dipolog siya nadawat. Tungod sa kalisod ug sa panginahanglan, nagkugi sa trabaho si Loie Tsunami aron sa pagbuhi sa iyang pamilya sukad usab niadto'ng nagbuwag ang iyang ginikanan. Hangtod karon, nagpabilin gihapon siyang ulitawo alang sa iyang pamilya nga maoy rason sa iyang pagkugi sa trabaho. Kalooy usab sa Ginoo, gisuklian usab iyang kakugi. Sa iyang pangidaron nga 26 anyos, station manager na siya sa istasyonang una ug hangtod karon iyang gialagaran.

4. Rico Perico sa 91.5 Hot FM (Glynn Bancairen) - "Feeling" DJ ang tawag niya kaniadto sa iyang mga boardmate tungod sa iyang pagsunod-sunod sa iyang mga paborito'ng Dj. Sulod lamang sa banyo madunggan ang iyang tingog kaniadto apan karon, sama sa langgam, iya na usab gisakop ang kahanginan. Sukad pa sa iyang pagtungha sa kolehiyo, nagsugod na usab siya sa pagkab-ot sa iyang hilig. Ang maong pagbansay-bansay nga gitamay lang niadto sa iyang mga kaubanan sa balay, dako gayud og natampo sa dihang mihimo na siya sa iyang unang pagtikang sa kalibutan sa pagpamaba. Apan kadto'ng panahona dili gyud sayon para sa iyaha. Hinuon, ang pagtimbang-timbang sa oras sa pag-eskwela ug trabaho miumol kaniya aron mahimong responsable. Ilabi na niadtong nahimo usab siyang gobernador sa Supreme Student Council sa ilang tunghaan. Sa pagkakaron, dili gyud ikabaylo sa lain pang trabaho ang pagka-DJ ni Rico Perico.

5. DJ Randi sa 93.1 I FM Pwede! (Kathlyn Cañete) - Mihuman sa kurso'ng Education apan imbes sa lawak saringanan nato siya maaninaw, sa kahanginan nato siya madunggan. Tuod man, wala gyud sa bokabularyo ni DJ Randi nga mag-DJ bisan pa man nga siya adunay nindot nga tingog ug maayo pud mobatbat sa pinulungang iningles o bisaya. Kini tungod kay madaog gyud siya sa kauwaw kung siya pasultion na. Kining iyang pag-abot sa ganghaan sa radyo, wala usab damha. Igo lang mikuyog ug giagni kaniadto sa iyang higala sa paghatag og demo tape sa usa ka istasyonan sa Iligan. Sa pagdahom nga ang iyang higala nga gusto gyud ma-DJ ang madawat, siya hinuon ang gipili sa istasyonan. Hinuon, kining trabaho nga kalit lang mitunga sa iyaha iyang gipalambo ug gikugihan.

Laing lima pa ka mga DJs ang atong hisgutan sa sunod nga Jamming.