Pamilya ni Yeng, palayasonon sa gipuy-an

Bisan og natapos na ang Pinoy Dream Academy, sa akademya pa gihapon nagpuyo ang Grand Star Dreamer nga si Yeng Constantino.

Gawas nga gilayuan siya sa ilang balay didto sa Montalban, Rizal padayon pa siyang nag-training hinungdan nga didto gihapon siya nag-istar.

Mas nahimong hectic ang schedule ni Yeng karon isip Grand Star Dreamer apan wala siya moreklamo niini, hinuon nagpasalamat pa siya sa iyang nahimong kapalaran karon.

Gihatag ni Yeng ang tibook ngadto sa iyang amahan ang nadaog nga P1M cash para ipalit og lote nga tukoran sa ilang bag-ong balay tungod kay ang balay nga ilang gipuy-an karon larotonon na sa Marso ug timing kaayo ang pagkadaog ni Yeng sa PDA.

Matud ni Yeng "Kung hindi po ako nanalo, hindi ko po alam kung saan titira ang pamilya ko".

Nakadaog usab og condo unit si Yeng nga maoy temporaryong puy-an sa iyang pamilya samtang wala pa silay daku-dako nga balay tungod kay ang maong condo gamay lang.

Wala mauwaw si Yeng nga mibutyag nga sa squatters area lang sila nagpuyo ug sa wala pa siya moapil sa PDA gihatagan lang sila kutob karong Marso sa pagpangita og laing kapuy-an sa bangko kinsa maoy tag-iya sa lote nga gitukoran sa ilang balay.

Wala magdahom si Yeng nga siya maoy makadaog tungod kay iyang nalilian nga si Ronnie (Liang) ang leading sa votes.

"Nasilip ko kasi 'yung leading sa votes nung umaga pa. Nakita ko ang name ni Ronnie (Liang) kaya sabi ko, talo na ako. Hindi ko alam later, umabante pala ako kaya gulat na gulat talaga ako", ni Yeng pa.-

Oyo ug Angel, namakak?

Dili maayo ang dagan sa panagbuwag nila ni Oyo Boy Sotto ug Angel Locsin busa giingong butbot lang ang nasalbar sa duruha ang ilang panaghigala.

Hangtud karon bisan makapila na gipaneguro sa masig habig nga walay "third party" ug kakuwang gyud sa panahon alang sa usag usa ang hinungdan, apan wala pa gihapoy hunong sa pagdilaab ang maong anggulo.

Busa naghinaot nga mahimong andam na si Angel nga mobutyag kabahin niini.

Karong gabii na ipahigayon ang presscon sa "Asian Treasure" ug siguradong dili makalikay sa press ang duha ka bida sa maong teleserye nga si Angel ug Robin Padilla sa mga pangutana kabahin sa mga kontrobersiya nga ilang nalambigitan.