Ginoo ang magbuot

"I am doing this for God," kini maoy deklarasyon ni Starstruck Top 16 finalist Hazel Uy atol sa iyang pagbisita sa showbiz oriented program OkRyan (3-4PM Monday to Friday) sa dyLA niadtong Biyernes. Ang pambato sa Sugbo miingon nga naniguro siya nga masulod sa Final 14 karong gabii apan andam usab siya sa bisan unsay mahitabo. Matud niya ang tanan iyang gisalig sa Kahitas-an.

Si Hazel miingon nga sukad pa sa sinugdanan dihang lakip pa siya sa liboan nga mga batan-on nga nanimpad nga masulod sa gikagubtang reality based artista search sa GMA-7 hangtud karon nga nagkaduol na siya sa katumanan sa iyang damgo, kanunay niya nga gipangayo sa Ginoo nga giyahan siya sa matag performance niya. Gawas nga duna siya'y gitaguan nga talento sa pag-awit, gani sakop man siya sa USC Choir, makamao usab siya mosuwat og kanta. Pong pa ni Hazel duna na siyay mga gitaguan nga kanta nga naghisgot kalabot sa paghigalaay, paglaum ug sa gugma. Tam-is ang pahiyom nga iyang gibuhian dihang gipangutana kun unsa sa maong mga kanta ang iyang paborito, mitubag dayon'g "songs of love." Pwes in love ba diay siya? Ang tubag mao nga negatibo pa sanglit ang iyang pagpanimpad maoy iyang labaw nga gihiguma karon.

Dili kabentahaan ang "chinita" nga si Hazel. Mas maanyag siya sa personal diin bisan og simple ug hinhin siya nga molihok dili malikayan nga makalingi ka niya aron imo siyang tutukan ug sination ang iyang buotan nga dagway. Puti ngadto na sa pinkish ang iyang pamanit samtang ang iyang pahiyom makabibihag.

Tinuod nga buotan siya sanglit bisan pa man og dihay episode sa Starstruck nga gisaway siya sa iyang mga katigi gumikan sa iyang gahi nga tinagalogan, maayo gihapong pulong ang iyang gibuhian alang kanila ilabi na ang mga babaye nga finalists. Suma pa niya si Jewel nga niadtong Domingo gikasab-an ni direk Louie Ignacio gumikan sa pagka reklamador, maoy labing relihiyosa nilang tanan. Samtang sa isyu sa iyang sayop nga tagalog accent, "Tinuod mana kay dili baya ta mga tagalog. Pero gamay ra man kaayo na ba, ma-correct ra man na pero dili jud right away."

Nanghinaot si Hazel nga ning ikaupat na katuig nga pagpangita sa Starstruck sa musunod nga labing dako nga bitoon sa industriya ang taga Sugbo makalangkat na gayud og titulo. Tabangi si Hazel pinaagi sa pagtype og STARSTRUCK<space>HAZEL<space>ug isend sa 2344 alang sa Globe, TM, ug Sun Cellular subscribers ug 367 alang sa Smart ug Talk n' Text subscribers.