Jay-r Siaboc special: Human sa pakigbisog

Kagahapon sa unang bahin ning Jay-r Siaboc special natino nga buwag na sila sa iyang co-scholar nga si Iya Guinez ug nga walay malisya ang ilang kasuod ni Yeng Constantino. Gibutyag usab niya nga walay nausab niya ug nagpabilin gihapon siya sa iyang pagka-siya, batan-ong puno sa paglaom apan mapaubsanon. Ning katapusang bahin, mayagyag na unsay nagpaabot niya karon nga nahuman na ang Pinoy Dream Academy.

Dako gayud og natampo sa personalidad ni Jay-r ang iyang pag-istar sulod sa academy. Matud niya didto nakat-onan niya ang makighugoy-hugoy ug magmasinabtanon sa nagkadaiyang batasan ug taras sa iyang mga kauban. Sulod sa academy nasuod niya sila si Eman, Yvan ug Jun.

"Sulod sa usa ka buwan, naglisod ko og adjust. Sige ra ko'g paniid sa mga batasan sa akong mga co-scholars. Pag-una conscious kaayo ko sa camera pero sa kadugayan naanad nako".

Para ni Jay-r dako kaayo og natabang niya ang PDA ilabi na ang mga teachers. "Ang pag-apil nako sa PDA mao ang akong total packaging sa akong talent ug sa akong attitude."

"Sa una, usa gyud kini sa akong mga pangandoy, pero kining tambay ra ta, murag nakaingon ko sa akong kaugalingon nga lisod kaayo siya nga makab-ot. Taga-gabii sige ko'g ampo sa Ginoo nga tabangan ko niya. Wala damha nakab-ot gyud nako ang akong pangandoy".

"Ang pagdaug nako sa PDA mao ang kinatas-ang pangandoy nga akong naabot".

Para niya ang bag-ong sulbong sa industriya, nadesisyonan niya nga dili una siya mag-uyab-uyab karon, ug maayo gayud iyang atimanon ang iyang trabaho aron siya magmalampuson ug magmalungtaron. Disiplina ang kanunay nga gisilsil ni Jay-r sa iyang alimpatakan.

Sa iyang pagbalik didto sa kauluhan karong Enero 2, yak-an na niya ang paggama sa iyang solo album nga duna unyay four cuts ug makauban niya ang iyang bandang Scrambled Eggs. Ipunting usab niya ang iyang panahon alang sa Sunday variety show ASAP ug sa umaabot nila nga mga World Tours.

Matud pa sa iyang co-manager nga si Mario Colmenares: "Magconcentrate na si Jay-r sa iyang recording ug singing career for two years kay mas nindot man gyud nga ma-establish siya samtang sayo pa".

Gipuno pod ni Colmenares nga mopadayon gihapon si Jay-r sa iyang training para makorehian ang iyang mga sayup samtang sayo pa.

"Winning as first runner-up in the PDA is good enough. Jay-r did his best and to be included in the top 6 is an achievement already" dugang pa ni Mario.

Samtang gibutyag ni Jay-r nga sa pagkakaron gibutang una niya sa bangko ang daog nga salapi nga P400,000 human giibanan og tax. Niadtong Miyerkules adunay gipahigayong motorcade si Jay-r didto sa Toledo gidugok gyud sa iyang daghang mga fans. Karong hapon makighimamat si Jay-r sa Cebu press aron personalan nga magpasalamat sa suporta nga gibubo ngadto kaniya samtang nagkigtigi pa siya sulod sa academy.