KC ug Lino, nag-date ug nag-holding hands?

Duna bay espesyal nga relasyon sila si KC Concepcion ug Lino Cayetano?

Ning bag-o lang mibuto ang balita nga buwag na gyud sila si Lino ug Bianca Gonzales ug mismong si Boy Abunda ang mibutyag niini sa The Buzz pipila na ka semana ang milabay.

Wala matataw ang tinuod nga hinungdan sa maong panagbuwag apan nalakbitan dinhi sa Banat Hugyaw nga si Erich Gancayco, ang Star Circle Quest winner nga taga Davao maoy gitumbok nga third party. Suma pa ang relasyon nila ni Erich ug Lino naumol samtang nagpadayon pa ang Calla Lily, susamang panahon nga kahugnuon ang relasyong Bianca ug Lino tungod sa kontrobersyal nga kasuod usab sa TV host ngadto ni Zanjoe Marudo samtang misalmot pa sila sa Pinoy Big Brother sa ABS-CBN.

Apan ang balita nga mikatap sa Internet mao nga nasigpatan sila si Lino ug KC nga nag-uban og kaon. Makausa nakit-an pa sila matud pa, nga nag-holding hands samtang mibiya sa usa ka restaurant sa Tagaytay.

Niadtong Biyernes, December 22, nakit-an si KC nga dunay kauban nga mestizo looking guy nga murag langyaw gyud, samtang naniudto didto sa Sonya's restaurant.

Ang nakakita nagtuo nga classmate ni KC nga Frenchman ang iyang kauban, apan sa dihang gipadul-an ug giklaro gyud og tan-aw, nasuta nga si Lino Cayetano kini- anak sa nagmalinawon na nga si kanhi Senator Rene Cayetano, igsuon ni Senator Pia Cayetano, director sa mga nawagtang na nga shows Little Big Star ug Anghel na Walang Langit, ug kanhi taga GMA-7 nga mitabok ngadto sa nataran sa ABS-CBN.

Suma pa nga si KC dunay shoot niadtong adlawa sa Tagaytay. Wala hinuon matino kon ang presensya ni Lino didto sa nahisgutang restaurant sulagma lang ba, giplano nilang duha o duna gayud siyay tuyo didto?

Leggings ang gisul-ob ni KC niadtong panahona matud pa, samtang khakis usab ang kang Lino. Hinuon dili flirty and sweet ngadto sa usag-usa ang ilang mga lihok kun dili very casual, matud pa. Igo lamang sila nga nangaon sama og managhigala.

Apan sa dihang mibiya sila sa restaurant, giingong nag-holding hands ang duruha.