Emphatzu nakapa'g og alibyo sa hisrock

Emphatzu. Matawag kini og usa ka play-up sa terminong "impatso" nga may kalabotan ang "indigestion". Posible nga ang hinungdan niini mao ang wala kahilisi sa kinaon o ang naglaundok nga hangin sulod sa pabawnan. Makalingaw kay mao kini ang gigamit nga pangalan sa usa ka banda nga daw sa na-impatso sa dihang sila nagtukaran pa isip mga show bands.

Pinaagi sa usa ka pagpakighinabi, nasayran nga gipul-an na usab sila'g tinukar sa mga requests, mga cover version sa mga kantang langyaw.

"The decision to shift gears was triggered by our search for growth, music-wise, under the Bisaya rock label. Palandong mi's Bisrock because we also would want to share in this penchant for creating own songs, making original music, and performing before a very supportive Bisrock community," pamahayag sa 19-anyos nga gitarista nga si John Hansel Apares atol sa gipahigayong pakighinabi sayong bahin ning semanaha.

"Sige mi'g cover sa mga foreign bands, ang ilang kanta lang ang nisamot kasikat," apas-sumpay ni Hansel nga mapasalamaton nga gitagaan na'g dakong luna ang maong paningog ning panahona.

Kauban ni Hansel sa Emphatzu ang gitaristang si Peter Paul Arbol, 19. Silang duha puros mga taga-barangay Lahug. Samtang ang ubang naglangkob sa Emphatzu mao sila'ng Niño Seno nga taga-Talamban (drummer), 23 anyos; si Nolan James Gako nga taga-Guadalupe (bassist), 19; ug ang 21-anyos nga songwriter sa pundok nga si Welgie Borjal. Si Welgie usab ang vocalist. Silang Welgie ug Nolan mga magdadayeg sa bandang System of a Down aka S.O.A.D. "We love the System for their being outspoken," pahimug-at pa sa duruha.

Ang System may upat ka mga sakop nga Armenian ang kaliwatan. Mga apo kini sila sa mga gitawag og "survivors of the Armenian Genocide". System is widely known for their "outspoken social and political views in many of their songs," dungag nga kahibalo gipasupot sa Emphatzu.

Nahibaw-an usab nga si Niño duna'y hamubong kasinatian isip drummer sa kaubang bandang Bisrock nga Agipo (Sikwati, Batang Nangka). Ang kanta sa Emphatzu nga "Binugok" (gugma na usab ang tema) nanganaw-kanaw na karon sa 93.1 Smash FM.

Si Great "Gege" Englis sa Bisrock band Glass of Dirt maoy mipahaum sa drum play sa dihang gi-record ang maong kanta. Ilang gisaysay nga labing una nilang gig ubos sa Bisrock genre ug isip Smashers ang "Banda Kontra Droga" event nga usa ka awareness campaign gipahigayon diha sa barangay Talamban kauban ang Missing Filemon (Sine-Sine, Prinsipal), Flirt (Nailad) ug Agipo (Pag-sure Oi!, Kabataan Para sa Bisrock).

"Gawas sa socio-political consciousness ug bass works sa System of a Down, amo usab nga gidamgo nga makaambit man lang sa imahen ug matang sa musikalidad sa Creed. Labi na gyud ang attitude sa gitaristang si Mark Tremonti samtang gilambod niya diha sa iyang pagtagik ang rock nga paningog ug ang tema may kabahin ang ispiritwalidad," matud pa sa Emphatzu. Lain pang mga impluwensiya sa Emphatzu ang ska, Alter Bridge, 311, ug ang mga Bisrock bands nga Gangrene ug Glass of Dirt.