Sandara nakulbaan pagsulod niya sa GMA

Excited usab si Sandara sa iyang TV guesting sa "Nuts Entertainment" ug "Sis" ugmang adlawa aron i-promote ang ilang filmfest entry nga "Super Noypi."

Giangkon ni Sandara nga gikulbaan gayud siya sa iyang pagsulod sa nataran sa GMA Network alang sa taping sa nahisgutang mga shows sanglit dunay tatak nga abs-cbn ang iyang gisakyan.

Apan matud pa niya nga nawala ang kulba sa iyang dughan tungod kay buotan man ang mga guards nga maayo kaayong miabi-abi kaniya.

Dungan niini, gibuking ni Sandara nga sa iyang guesting sa Nuts, walay gihunghung niya atol sa "bulongan" sa Balakubak portion.

Gipangutana usab si Sandy kon mo tan-aw ba kini sa salida sa iyang uyab nga si Joseph Bitangcol sa salida niini nga "Shake, Rattle & Roll 8" ug dali kini nga mitubag ug miingon nga dili kini siya mo tan-aw.

Samtang gitin-aw ni Sandara nga wala siya magselos ni Roxanne Guinoo nga maoy partner ni Joseph Bitangcol sa "Shake Rattle and Roll 8."

Miingon siya nga dili lang siya motan-aw sa maong movie tungod kay dili siya ganahan og horror movies.

Samtang sa "Super Noypi" super heroine nga ang powers anaa sa iyang baston.

"Para lahat ng gusto ko, ima-magic ko na lang tulad ng pera. Pag gusto ko ng maraming pera, magma-magic na lang ako,"pasabot pa ni Sandy nganong ganahan siya nga dunay powers.

"Fallen," Piolo-Regine movie

Madayon na gyud ang permirong shooting nila ni Regine Velasquez ug Piolo Pascual nga ubos sa Star Cinema. Ang tentative title niini mao ang "Fallen", ug matod pa sa Disyembre 5 unta kini sila magsugod ug shooting pero na postpone ngadto na sa Disyembre 14 apan wala gihapon matuman.

Sa Batangas ug La Union ang shooting sa maong pelikula ug ang naila na sa romantic-comedy movies nga si Joyce Bernal maoy direktor.

Nasayran nga adunahan ang papel ni Piolo sa maong salida samtang single mom ang role ni Regine.Gipaabot nga sa Mayo sunod tuig ang showing niini.