RJ matabunan sa Yeng-Jay-R loveteam

Nagdahunog ang mga huhungihong karon sa nataran sa Kapamilya network nga buhian na niini ang unang naugmad nga loveteam nila ni Yeng Constantino ug RJ sanglit buot niini nga palig-onon ang Yeng-Jay R partnership.

Usa ka kasaligan nga tinubdan mitug-an sa Banat Hugyaw nga sa wala pa mahuman ang Pinoy Dream Academy, plano na gayud sa Star Magic nga sila si Yeng ug Jay-R maoy unahon og atiman aron dali nga muabot ngadto sa tumoy sa kabantog.

Misamot matud pa ang maong tinguha karon nga silang duha ang migawas nga mas kusog, lig-on ug humot ngadto sa publiko sanglit gipabahaan man sila sa gikinahanglan nga text votes nga miresulta sa ilang kadaugan.

Si Yeng maoy napiling labing unang Pinoy Dream Academy Grand Dreamer samtang si Jay-R maoy nagsunod kaniya.

Ang obserbasyon usab sa movie press sa kauluhan mao nga sayon ra ibaligya ang duruha sanglit daghang mga detalye sa ilang kinabuhi nga managsama.

Una pareho sila nga mga high school graduates ug naggikan sa pobre nga pamilya. Ang amahan ni Jay-R jeepney driver samtang ang kang Yeng janitor sa usa sa mga departamento sa Ateneo University.

Pareho usab sila nga sa sulod sa academy nakakita og hinigugma - si Yeng kang RJ samtang si Jay-R kang Iya.

Samtang dunay mga namahayag nga wala molihok sa kauluhan ang "voting power" sa Sugbu hinungdan nga naparot si Jay-R.

Apan ang mga observers dinhi sa Sugbu dili uyon sa maong pamahayag sanglit matud pa nila tataw nga natunga ang text votes tali nila ni Panky ug Jay-R sanglit unang higayon nga duha ka mga taga Cebu ang nagtigi alang sa suporta, sukwahi sa ilang panahon ni Keanna Reeves ug Kim Chui sa Pinoy Big Brother Academy kaniadto.

Apan bisan pa man niini, masaligon sila nga molugwa ra gihapon sila si Panky ug Jay-R sa entertainment world sanglit pareho sila nga dunay tiunay nga mga talento.

Daghan ang wala na mahingangha sa kadaugan ni Yeng sanglit sa naghinapos nga bahin sa PDA tataw man nga humot ang 18-anyos nga dalaga ngadto sa publiko, base usab sa kakusog karon sa iyang kanta nga "Hawak Kamay."

Si Yeng mihipos og 37.32% votes. Si Jay-R nga maoy first-runner up nakaangkon og 32.78%, samtang si Ronnie nga maoy mikompleto sa Top 3 mikuha og 29.9%.

Si Panky nahimutang sa ikaupat nga dapit, 15.27%. Bisan pa man niini, ang gitawag nga "world-class performer" mapasalamaton sa tanang misuporta kaniya ug namahayag nga malipayon siya alang ni Jay-R. Gipakpakan pag-ayo si Panky human siya misinggit og "nagbago na po ako."

Samtang si Yeng napaluhod sa entablado, mihangad sa kahitas-an og nagpasalamat sa tanan.

"Maraming maraming salamat po sa lahat ng sumuporta. Pinasaya niyo po ang aking buong pamilya."

Si Mario Colmenares, talent manager ni Jay-R nagpasalamat ug nanghinaot nga magpadayon ang mainitong suporta sa mga Sugbuanon karon nga nahuman na ang PDA.

"In behalf of Jay-R and his family, my sincerest thanks to all Cebuanos who supported him and believed in he's talent while inside the Academy. We hope that you'll keep on supporting him and pray for God's guidance now that his outside PDA," pong pa niini sa text message nga iyang gipadala ngadto ni The Freeman entertainment columnist Angela Calina.

Kagahapon sa udto gipahibaw sa ASAP '06 nga ang PDA Top 6, maoy labing bag-o nga regular members sa nahisgutang Sunday variety show.