Walay problema sa Colon St.

Mga Manash, before anything else [again], ang Colon street nga akong giingong way problema, dili mao ang lugar nga Colon street dinhi sa downtown area diin anaa ang University of the Visayas Main Campus ug Gaisano The Main Store, kay kon problema ang hisgotan, daghan og problema ang Colon street gawas sa mga sidewalk vendors nga hapit naa na lang diha mamuyo, og mga snatchers, mga mangingilad ug uban pa. Wa pay labot nianang hangtod karon, wa jud tawon ilisi nga signage diha sa marker sa corner Colon ug Mabini nga nagkanayon, "Ang Colon street ang pinakamatanda." Kay wa pa man ko malimot nga ang word nga pinakamatanda, para lang na sa dunay kinabuhi sama sa tawo, hayop or kahoy. Ang Colon street wa may kinabuhi, so dapat, ang word unta gayong gigamit, pinakaluma, kay ang luma, para sa way kinabuhi kon life. Ga-saad na kono ang Historical Commission nga ilisan kini many many years ago, pero matabunan na lang tingali'g landslide simbako ang Colon street, di pa gyod tingali na mailisan. Nalingaw ko's mga taga Historical Commission, kay wa maulaw. Laing pangutana, nganong gitinagalog man? Gapatugatuga og tinagalog, di kamao? Mora'g taga bukid sa unang panahon nga kon moadtog Manila, bisa'g duha lang ka adlaw, tinagalog nay isulti?

Eniwee, ang bout jud nakong ipasabot sa Colon street mao ang Calle Colon sa umaabot nga project sa 5th Avenue Group nga gitawag og CIUDAD, nga anha sa karaang International School sa Banilad. Di na man lang gud unta ko motambong sa presscon, kay pang community man og pang Business man to, pero dako ko'g utang kabubut-on sa nagdapit nga tagoon lang nato's ngalan nga Jonji Gonzales, kay siya bayay hinungdan nganong naa na sad ko'y 6280 Nokia cellphone, so mao to'y asking question nako, wa ba sila ka sugat og negative or positive reactions sa ngan nga Calle Colon sa usa sa mga features sa CIUDAD. Niini konong lugara, makita ang mga de kalidad nga mga restaurants diin mahimong ikapahigayon ang mga concerts [there, nasingit ang concerts, pang showbiz gihapon, di ba?], ug mga outdoor exhibits among others. Miingon tong nitubag nako, gikonsulta gyod kono nila ang icon sa culture sa Cebu nga usa ka iladong architect ug broadcaster nga si Melva Rodriguez Java, ug mipasalig kono's Architect Melva nga way problema. Tuod, pag-abot jud nako sa site sa groundbreaking, gisugat ko'g mga uniformed honest to goodness guardia civil sa panahon sa mga katsila, abi nako'g dunay rebolusyon, mao diay to ang uniform sa ilang mga security guards. Gimmick sad, di ba? Kon wa tay lingaw in the near future, hisgotan ni nato'g usab, okay? Makigkulukadidang pa raba ko nilang Ryan Agoncillo ug Judy Ann Santos (moagi sa Sugbu gikan sa Bohol karong December 17, diin dunay hamubo nga presscon sa dili pa sila modiretso sa Ilo-ilo City-ed), so dinhi lang una ta kutob.