Nadoble ang maong kakuyaw tungod kay nasayran kagahapon nga walay mga vote cards ang SM Cebu sukad pa niadtong Martes hangtud kagahapong adlaw. Mismong talent manager ni Jay-R nga si Mario Colmenares mitug-an sa Banat Hugyaw kagahapon nga namalihog na lamang siya sa iyang mga higala sa Manila aron mopalit og vote cards. Wala hinuon magtuo si Mario nga dunay sabotahe nga nahitabo.
" Dili sad oy, kay in fairness sa PDA sige baya gyud sila'g follow-up kon niabot na ba. Lahi raman gud na ang vote cards kay sa abs-cbn interactive mana. Ang SM sad nga ni-promise nga Tuesday moabot ilang vote cards miingon nga overlooked kuno nila ilang P.O.," pasabot pa ni Colmenares.
Matud niya nga kon fan base lang ang hisgutan masaligon siya nga daghan og tigpaluyo si Jay-R kinsa lumad nga taga Toledo City ug bokalista sa bisrock band Scrambled Eggs. Apan midugang si Colmenares nga lahi ra gyud kon vote cards sanglit mas dali ang proseso apan mas dako ang puntos nga mahatag alang sa iboto nga scholar.
"Ang amo na lang gibuhat nga ako na lang gipa-scratch ang vote cards unya ang pin number maoy gipadala diri kay daghan man gyud ang mamalit," dugang tug-an ni Colmenares.
Gibutyag usab ni Colmenares nga gawas sa mga Sugbuanon daghan usab ang nagsuporta ni Jay-R nga mga Pilipino sa gawas sa nasud, sama sa mga Filipino communities sa London ug California. Gani suma pa niya ang transaction receipts sa boto nga gibubo nila alang kang Jay-R gipadala man, pinaagi sa www.Scrambled-Eggs.net. Matud pa niya nga nakagusto ang maong mga Pinoy kang Jay- tungod kay "makalingaw ug versatile talent" ang garbo sa Toledo City.
Dungan niini migawas usab ang taho nga perteng paningkamot sa pamilya ni Irish Fullerton diin matud pa walo niya ka mga iyaan gikan sa America ang namauli na ug namakyaw og vote cards aron masiguro lang gayud nga masulod sa Top 6 ang nahisgutang global scholars.
Ang mga pambato sa Sugbu sa nagpadayon nga Pinoy Dream Academy sa ABS-CBN, Panky Trinidad ug Jay-R Siaboc maoy labing mubo og text votes sa walo ka mga scholars. Busa dakong peligro nga silang duha maoy dili malakip sa Top 6 ug mapalagpot na sa hingpit sa katapusan nga Expulsion Night karong gabii. Apan dili pa uwahi ang tanan aron sila maluwas kun magtinabangay ang tanan. Nan, salbahon nato sila si Panky pinaagi sa pagpabaha og text votes pinaagi sa pag-type og PDA (Space) Panky ipadala ngadto sa 2331 for Globe, Touch Mobile and Sun Cellular subscribers and 231 for Smart, Talk 'N Text and Addict Mobile users. Type usab og PDA (space) Jay R ug ipadala sa mao gihapong mga numero.