Pasikat sa Brownian Method 'Ang Pagbalik sa mga Tabian'

"Pasikat, pasikat, sige lang og pasikat." Kini maoy pamilyar nga linya nga bag-ohay lang giyamyam sa kadaghanan dungan usab sa pagsulbong sa grupong Brownian Method. Apan sa kalit lang nahanaw sa kahanginan ang tingog sa nahisgutang grupo inay mianam na sila og paibabaw sa kalibutan sa musikang bisaya. Tuig 2003 sa dihang naila sila pinaagi sa mga kantang "Pasikat" "T-back", ug "Pinasagdan sa kusina", nga nanganaw-kanaw tulo na ka tuig ang milabay. Unsay nahitabo sa Brownian Method? Hain na sila? Nahibalik na sila human sa usa ka tuig nga pagpakahilom. Ug ning subli nilang pagpanimpad diha sa bul-og sa kompetisyon mas lig-on na ang grupo sanglit gisabak na ang ilang album sa Viva Records South. "Ang Pagbalik sa Tabian," nga dunay carrier single nga "Tabatsoy Pinoy," maoy ulohan sa nahisgutang album nga ilusad sa dili pa ang Sinulog festival sunod tuig.

Atol sa contract signing tali sa Viva ug sa maong grupo sa Casa Verde sa milabay nga semana, gibutyag ni Rey Nacilla aka McRey nga dunay 12 ka mga kanta nga Tagalog ug Bisaya ang nalakip sa maong album. Ang nakapahugyaw mao nga ubay-ubay sa mga local artists ang nakigtambayayong usab ug dunay partisipasyon niining maong proyekto. Lakip sa mga naka-duet sa Brownian ning maong album mao sila si ABS-CBN reporter ug Freeman Correspondent Ramil Ayuman, Jomark, Erwin Lim ug Cebuana diva Eva Santos.

Masaligon si McRey nga bisan og milipang karon og maayo ang bisrock duna gihapon silay sirkulasyon sanglit lahi man ang ilang genra.

"I am not afraid, bisan pa man og daghan na ang misulpot nga mga banda kay lahi man sad ang among style ug lahi man sad ang ila," matud pa ni McRey nga nahinabi sa Banat Hugyaw.

Ang Brownian Method gilangkuban na nila karon ni Rey Nacilla a.k.a McRey ug Edwim Colina a.k.a. Ja-Ghetto, ang bag-ong miyembro sa maong grupo. "Happy me nga naa mi sa Viva karon," padayag ni McRey.

Kahinumduman, ang grupong Brownian Method nagsugod niadtong tuig 1997 apan sa nagtungha pa sila sa high school maayo na silang mo-rap. Gumikan usab sa kaaktibo ni McRey sa mga kalihukan sa tunghaan nabaid ang iyang talento sa pagsuwat ug pagkanta. Busa, si McRey nga maoy mibarug isip lider sa grupo maoy nagsuwat sa kadaghanan sa ilang mga kanta ilabi na sa debut album nila kaniadto.

Lakip sa mga influence sa grupo mao ang ilang mga idolo nga sila si Tupac, Dr. Dre ug Francis M nga naila dinhi sa Pilipinas nga labing maayong rapper. Gipadayag nila nga bisan pa man gikagubtan ang ilang album kaniadto, matud ni McRey wala pa nila kaayo mabatyagi nga mainiton sila nga gihangop sa ilang masig ka Sugbuanon.

"Kabalo ka wala lang gihapon nako ma-feel hangtud karon nga naila mi dinhi sa Cebu ug sa laing dapit sa Pilipinas. Feel nako nga ubos lang gihapon mi hangtod karon, apan nanghinaut ko nga kining ikaduha namo nga album dugokan unta sa atong mga kababayan, kay kasagaran nga mga kanta namo mga bisaya man," panghinaut pa ni McRey.

Malaumon si McRey nga suportahan sa mga Cebuano ang ilang mga kanta ug ang ilang umaabot nga mga gigs sa sunod tuig diin ilusad na sa Viva Records ang ilang ikaduhang album, "Ang Pagbalik sa mga Tabian".

"The unity of the group and the mutual desire to create one task is present as well - a value that is a must for any performing artists, whatever their forte maybe. Support the Cebuano artist, support Brownian Method," dason pa usab sa Viva Records.

For bookings and inquiries, kindly contact or send a text message to 09196870377