Rock nga habig sa reggae

Reggae music. Ginaingon nga ginama tinukmod sa intelihenteng mga pwersa. Usa ka matang sa musikanhong mugna nga namuklad sa usa ka gamay nga nasud sa Caribbean. Gani, tulbok lang kon tan-awon ang Jamaica sa kinatibuk-ang mapa. Apan bisan pa man niini, makapahugyaw ang reggae kay karon nahimo na kining tipik kon kabahin sa "popular culture" nga minglagbas sa nagkalain-laing kultura latas sa kalibotan.

Gihulagway ang reggae nga anthem, komentaryo sosyal ug politikal nga gipaagi og kanta; ingon man ang mga politikal nga protesta ug pagsuki batok sa mando sa mga nanagkupot sa renda sa pangagamhanan. Gilantaw nga pinaagi sa reggae nga kanta mapasupot ang mga mithi sa reporma o kabag-uhan.

Taud-taod nang gitamod ang reggae music dinhi sa atong nataran. Gani, naka-impluwensiya kini sa pagkatap sa mga bag-ong istilo sa maong paningog ug nakapaaghat nga mapadaghan ang mga banda nga may mga orihinal nga komposisyon ginamit ang maong genre. Hinungdan nga ang Cebu aduna'y reputasyong "reggae capital of the Philippines".

Sa dakong respeto alang niining maong musical genre nga nanglipang gikan sa kaminyoon sa mga nanag-unang istilo sa musika - ang soca ug mento - sa Tunga-tungang Amerika, usab dakong damgo nga makakulit og agianan alang sa lawom nga pagsabot sa gitawag og "Pinoy social fabric", ang No Parking Anytime sa barangay Apas, dakbayan sa Sugbu nagmugna sa laing istilo sa reggae.

Usa kini ka spin-off, matud pa, basi sa impluwensya sa ska band Sublime ug Black Uhuru nga nagpauso sa dub, usa sa mga nahimong basihanan sa pagkamugna sa techno music.

Laing mga impluwensya, sumala pa sa mga sakop sa NPA, mao si Alpha Blondy, ang Ivoirian reggae singer kansang mga lyrics nagpalapad sa mensahe sa "strong political attitude" nga sinambugan sa pasiaw; ingon man si Bob Marley and the Wailers. Si Uncle Bob gihulagway nga "most widely known performer of reggae music, famous for having popularized the genre outside Jamaica and considered as one of the greatest songwriters of all time."

Sa tuig 1963, silang Bob Marley, Bunny Livingston, Peter McIntosh, Junior Braithwaite, Beverley Kelso, ug Cherry Smith nagkatapok ug gitawag isip "The Wailers".

Usab, ilang gikonsiderar nga usa ka lig-on nga impluwensiya si JR Gong, usa ka Grammy-winning reggae artist ug kinamanghoran sa tanang lalaking anak ni reggae legend Bob Marley. Angga ni Damian ang Junior Gong nga iyang gihulam gikan sa angga sa iyang amahan nga Tuff Gong. Ang pundok nakadayeg pag-ayo sa iyang abilidad sa "deejaying", ang Jamaican nga istilo sa "rapping". Gipadayag usab sa mga sakop sa NPA nga dako ang ilang respeto sa Steel Pulse nga mao ang nagpasiugda sa Rockers, usa ka sub-genre sa reggae. Sa ngadto-ngadto, ila usab nga gihangop ang istilo sa Incubus, usa ka alternative rock band sa California ug ang 311 ("three eleven"), nga rapcore/punk rock/reggae/funk group sa dekada '90.

Ang bahista sa NPA nga si Edgar Brim "Bim-Bim" Arevalo mihulagway sa ilang istilo nga "the rock side of reggae", ug naningkamot nga gawas sa naandang social commentaries mapakita nila ang sentimentality sa Cebuano reggae artists nga maoy nakatatak sa ilang orihinal nga komposisyon nga nag-ulohan og "Kaibigan".

Ang No Parking Anytime magtukaran sa La Mer Café matag Biyernes alang sa Reggae Jammin' Nite. Gawas ni Bim-Bim, silang John Rodrigo "Johnex" Garcia sa keyboards, Jules Hechanova sa lead guitars, Edzel "Ed" Rubite sa rhythm guitars, Antonio "JR" Baran, Jr. sa drums ug Beni "Jun-jun" Hechanova, Jr. sa vocals maoy naglangkob sa pundok.

Gipupo nila ang ilang pangalan gikan sa usa ka road sign duol sa ilang nahimutangan gawas sa usa ka concert venue sa Ayala Business Park. Nanukar niadtong tungora ang Parokya ni Edgar.

"Wa man gud mi budget para entrance maong nag-agwanta lang mi sa gawas sa venue pero makita ug madungog ra man. Wala pa mi mag-recording kay imbis reggae-stylie mi, pobre-stylieee pa gyud!", pasiaw ni Bim-Bim, nga gidasonan og yango ni Jules, samtang ang uban nanagngisi na lang sa ilang gilarawang kawad-on.

Bisan pa man sa kakulian nga maka-record, sila mapasalamaton gihapon sa Beat Box Studio ug Lyts and Sounds. Ma-contact ang Beat Box ug Lyts sa 09165465691. Usab, mapasalamaton sila kang Papa Jesus, Abraham Arevalo, Arevalo family, Baran family, Garcia family, Hechanova family, Daidee dela Serna, Macuro family, mga residente sa Apas labi na gyud ni Hon. Clemente Rosales nga lig-on nilang tigpaluyo."BIM-BIM" Arevalo - bass, vocals; ug Benie "JUN-JUN" Hechanova Jr.