Sa kawad-on migitib ang paglaum

Luyo sa malipayon nga disposasyon ni Jay-R 'Itsoy" Siaboc karon sa sulod sa Pinoy Dream Academy, nagpahipi ang usa ka kasinatian nga daw sa soap opera lamang sa telebisyon masaksihan. Apan tinuod kini nga naagian ug nasuwayan ni Jay-R. Kining tanan naggumikan kay ang ilang pamilya nag-ilaid sa tumang kalisod.

Nasayran sa Banat Hugyaw gikan sa mga mahal sa kinabuhi ni Jay-R nga human siya mitapos sa high school duha na katuig ang milabay, midesisyon diay siya nga manimpad sa kaulohan sanglit ang iyang mga uyoan dunay banda usab nga gidumala. Apan ang problema mao nga wala siya'y pamilite. Apan nag-uros-uros ang determinasyon ni Jay-R busa wala niya himoang problema ang maong suliran.

Ala una pa lamang sa kadlawon mibiya na si Jay-R sa ilang panimalay sa barangay Awihao Toledo City. Nanghangyo siya sa usa ka higala nga mo-hitch sa truck de karga nga magtumod og isda sa Pasil. Pag-abot sa dakbayan, namasin na usab siya nga makasakay og C130 sa militar ug daw gibuligan siya sa higayon sanglit malampuson siya nga miabot sa kaulohan.

"If there's a will, there's a way," kini maoy prinsipyo nga gibarugan ni Jay-R, prinsipyo nga inanay nga nag-agak niya paingon sa tumoy sa bungtod sa kalampusan. Pag-abot niya sa Manila "extra-extra" siya sa banda sa iyang mga uyuan, apan giabot siya og kapuol busa midesisyon na usab siya nga mobalik sa Sugbu.

Ug wala gayud masayop si Jay-R sa mao niyang desisyon tungod kay sa pagbalik niya sa Toledo niadtong Enero 2005, gikuha siya ni Louie Espinosa, igsoon ni Toledo City Mayor Arlene Daydee Zambo, isip bokalista sa bandang Scrambled Eggs. Sa walay pagduhaduha, misugot si Jay-R, kay mao gayud kini iyang gipangandoy.

Dihang nagsugod na siya sa Scrambled Eggs, nagproblema lamang gihapon siya tungod kay sa ilang mga kids mga gigs sa Cebu, Leyte ug San Carlos ug ubang parte sa Cebu, kausa sa usa ka semana, balik-balik intawon ang iyang outfit. Usahay manghuwam siya og isul-ob sa iyang mga ig-agaw. Ang nakanindot ni Jay-R matud pa mao nga tanan niyang kinitaan ihatag gayud niya sa iyang inahan.

"Buotan gyud kining bata-a, kung ako siyang badlongon, maminaw gayud siya," butyag pa sa iyang mama. Si Jay-R hilumon ug dili kaayo mosulti sa iyang pamilya sa iyang mga kalihukan, gani sa barkada na lamang masayran unsay iyang mga aktibidades.

"Wala gyud mi kahibalo nga mo-audition siya sa Pinoy Dream Academy," butyag pa sa iyang mama Minda. "Gipaandam ko niya og birth certificate pero wala siya miingon para unsa kini, unya paghatag nako sa birth certificate nananghid kini nga moadto sa Cebu kay magpraktis sa banda."

Bugtong si Mario Colmenares, manager sa Scrambled Eggs, maoy nasayod sa pag-audition ni Jay-R. "Wala gyud nagsaba-saba si jay-R sa audition, ako ra gyud tawn ang nakahibalo, nalu-oy man sad ko sa bata kay naa man gyud kini talent busa ako siyang gikuyogan sa audition," butyag pa ni Colmenares ngadto sa Banat Hugyaw.

Sa adlaw sa audition, nasorpresa ang pamilya ni Jay-R dihang mi-text si Mario sa igsoon ni Jay-R nga si Michael nga paampo-on nga masulod ang nahisgutan sa audition. Sa audition day, sa unang round igo ra nga again sa camera ang mga namasin ug usa si Jay-R sa napili busa sa sunod nga hugna, gipakanta na siya. "Making Love Out of Nothing At All" sa Air Supply ang gikanta ni Jay-R. Sa 20 nga gikuha, ika-19 nga gitawag si Jay-R busa wala malikayi nga nakulbaan ug hapit na sila mawad-i sa paglaum. Sa katapusan nga hugna, gikanta na ni Jay-R ang sikat na kaayo karong pisa sa Scrambled Eggs, "Hilot" nga nakalingaw kaayo sa mga nanan-aw. Siya gihapon ang katapusan nga gitawag, lakip na niadtong grand launching sa Cebu Capitol grounds.

"Naguol gyud si Jay-R dihang padung na siya mosulod sa PDA kay iyang gihunahuna ang iyang pamilya, mao ako siyang gi-ingnan nga akoy bahala sa imong pamilya diri, pag-concentrate sa PDA," dugang asoy pa ni Colmenares.

Karon naguol gayud ang pamilya ni Jay-R nga na-nominate siya kay wala silay igong kwarta para sa text votes or vote cards, itandi sa ubang nominees. "Dako kaayo ang among pasalamat ni Mario, ni Mayor Dydee ug iyang mga officials ug sa tanang misalig sa talento ni Jay-R, nga padayon gyud nga nagsuporta sa akong anak."

"Nanghinaot ko nga suportahan nila akong anak, ilabi na sa mga Cebuano," pangindahay ni mama Minda.