Paalam, direk

Naglisod na pag-ila sa kanhi niyang mga talents si direk Gene Labella niadtong usa ka higayon nga nag-abot ang pipila ka mga local showbiz personalities sa usa ka acknowledgement activity sa mga tawo nga may kalabutan sa pagpalambo sa showbiz sa Sugbo nga didto himoa sa SM- Cinema 1 pila na ka buwan ang nakalabay. Gani, bisan si Caridad Sanchez nagpaila na lang sa iyang kaugalingon, ug ako nga nangutana kang direk kon nakahinumdum pa ba siya nako, giingnan kong Caring [ang tawag namo ni Caridad Sanchez] "Sus, ayaw na lag pangutan-a, sultihi na las imong ngalan.." Kay niadtong higayona, nag-wheel chair na man si direk Gene human siya na-stroke.

Daghan kaayo kog naagiang kasinatian ni direk, kay nahimo nakong usa sa mga suod nakong higala sa showbiz si anhing Esterlina, ang artistang napangasawa niya [Ester Colina] nga usa sa labing amiable nga artista sa pelikulang binisaya gawas sa iyang pagka professional kaayo sa iyang trabaho. Sila ang ginikanan ni City Councilor Edgar Labella, ang alang kanako, labing meticulous nga konsehal. Gawas niini, may mga higayon nga dili magkatakdo ang mga hunahuna namo ni direk sa mga pamaagi sa paghimo sa pelikula busa, usahay mabasa na lang niya sa column nako kanhi labi na sa Bisaya Magazine diin nahimo kong ghost/guest writer ni Justo C. Justo, nga maoy hinungdan usahay nga magathan ko ni direk bisa'g sa elevator, labi na kay midapig ko niya pagdaog niya isip best director sa pelikulang "Mayor Andal" [gibitoonan nilang Novo Bono, Marilou Mercader, Tessie Sevilla , Tinoy de Gracia, anhing Porcing Torrevillas ug uban pa] diin, napili si Chanda Romero isip best actress sa pelikulang "Anino sa Villa Lagrimas," apan gilabay ang iyang trophy pagdawat niya, kay didto siya dapig ni direk Borlaza, nga nominated sa best director alang sa "Anino sa Villa Lagrimas." Pag-apil nako sa "Si Goot da Wanderpol" gidala ni direk Gene Labella ang iyang mga estudyante sa Masscom sa USJ-R sa among location ug gipaila ko niya nga "the best actor and entertainment journalist" nga nakapadako sa akong atay, ug nagkabalik ang among maayong relasyon. Unya, dili pa dugay mipanaw na si direk sa laing kalibutan busa sa tinagalog pa, "PAALAM, DIREK" but since we believe in heaven, we shall meet again, PROMISE.