Miss Venezuela ang Miss International

Pakyas ang Pilipinas pagpanalipod sa korona niini sa bag-o pa lamang nahuman nga Miss International 2006 didto sa Shanghai China niadtong Sabado sa gabii. Ang pambato sa nasud nga si Denille Lou Valmonte palpak sa pagsulod isip Top 10 semi- finalist.

Ang batan-ong garbo sa Venezuela Daniela Di Giacomo, nga gitawag og "Latin Barbie" sa mga beauty experts maoy gipurongpurongan isip 26th Miss International. Ang model ug TV personality nga si Di Giacomo wala na makapakugang tungod kay napanglantawan nang daan ang mao niyang kadaugan sanglit usa siya sa labing lig-on nga mga kandidata sa nahisgutang indigay.

Nabantayan usab nga matag tulo ka tuig sukad niadtong 1997, hangtud karon makadaug og Miss International crown ang mga pambato sa Venezuela. Buot ipasabot, ang Venezuela maoy naggunit sa korona sa mga tuig 1997, 2000, 2003 ug 2006.

Wala na usab makaliti ang mga beauty experts sa kadaugan nila ni Miss Panama Mayte Sanchez (1st) ug Miss Korea Yoon-Seo Jang (2nd) tungod kay maayo usab ang ilang gipakita nga labok sa sayong bahin pa lang sa indigay.

Ang mikompleto sa grupo sa mga semi-finalists mao ang China (Chen Qian), Colombia (Karina Guerra), Dominican Republic (Wilma Abreu), Guadeloupe (Meryta Melina), India (Sonali Sehgal), Japan (Mami Sakurai), Puerto Rico (Sharon Gomez), Spain (Sara Sanchez) ug Thailand (Vasana Wongbuntree).

Nakugang hinoon ang mga beauty experts human wala malakip sa semi-finalists ang ang mga "heavy favorites" nga sila si Miss Finland ug Miss Germany. Samtang unang higayon kini nga nasulod isip semi-finalist ang pambato sa Guadeloupe. Si Miss Hong Kong maoy midaug sa isip Miss Amity, pasidungog nga nalangkat nila sa ikatulo na karon ka higayon, samtang si Miss Panama usab maoy miangkon sa 'best national costume' prize.

Si Precious Lara Quigaman, garbo sa nasud, maoy mi-turn over sa Miss International title ngadto ni Miss Venezuela.

Maricel nagminaldita sa press

Gikatahong nagbinastos si Maricel Soriano sa kaugalingon niining presscon diin matud pa sa PangMasa wala niini tarunga og tubag ang mga pangutana sa press ug miresulta sa pag-walk out sa mga magsusulat.

Usa mga gibastos matud pa, mao ang usa ka editor nga nangutana kun ready na ba si Maricel nga mamahimong lola ug gitubag kini sa aktres nga, "kung ready ka nang maging lolo, eh di ready na rin akong maging lola."

Gisapot matud pa ang mga sakop sa press ug suma pa nila kun wala sa mood ang aktres mas maayo nga wala na lamang kini motambong sa presscon inay magminaldita. Suma pa nga disappointed ang press tungod kay tagsa na lamang makita si Maricel sa big screen, meaning tagsa na lamang nila kini mahinabi apan nagminaldita pa gayud.