D'Kazins:Kampiyon saE-mall band challenge

Niadtong Hulyo 27, usa ka artikulo may kalabutan sa pagkamalampuson sa lima ka mga bata sa natad sa pagpanukar inabagan sa ilang magtutudlo sa A. Salonga School of Music napatik sa The FREEMAN, ang igsoong mantalaan ning maong tabloid. Ang maong artikulo nga gisabak sa Entertainment page nag-ulohan og "Kazins: The Band to Watch".

Tangkod nga tulo ka buwan gikan sa pagkapatik sa maong panglantaw nga ang kinamanghoran sa tanang bandang Bisrock makalangkat pa og mas daghang kadaugan ug kalampusan sa natad sa musika, silang Jhelsea Maine Flores (vocals), Jogen de la Cruz (keyboards), ang managkaluhang Whenvy Lyn Noel (lead guitar) ug Whenvy Jean Noel (bass guitar), ug si Mary Adrean de la Cruz (drums) nga mga taga-Canjulao, dakbayan sa Lapu-Lapu City nigawas nga mananaug sa bag-o pa lang nahuman nga Oktoberfest Band Showdown diha sa Elizabeth Mall, dalan Leon Kilat ug South Expressway.

Ang lima hugyaw nga nanganta og usa ka cover sa "I Will Survive" nga gidasunan sa "Naunsa Na?", ilang independently produced single nga gitagik sa ilang mentor nga si James "Jimvoy" Dionson, keyboardist sa laing Bisrock band - ang Makadawa. Karon nanganaw-kanaw na ang maong single sa 93.1 Smash FM - Cebu's Rock Fortress.

Lanog, naglagubo ug nagtagubtob ang E-Mall Street Level niadtong Oktobre 20 sa dihang gilangkat sa D'Kazins ang pwesto isip kampeyon sa maong bangga sa mga banda nga gisalmotan pa sa laing 14 ka mga banda gikan sa nagkalain-laing tulunghaan ning dakbayan ug sa mga kasikbit pang mga lugar.

Ang D'Kazins nakadawat og ganting mobalor og P15,000 cash ug tropeo, ug gidapit pag-usab sa GMA-7 Cebu variety show nga "Oi" karong Domingo puhon.

Ang "Anak sa Liking Kawayan" mao ang nahukmang 1st runner-up ug gitunolan sa P10,000 cash nga premyo lakip ang tropeo. Samtang ang "Chorus" mao'y napiling 2nd runner-up nga may pahalipay nga P5,000 cash ug tropeo.

Ang inter-school band challenge usa ka konsepto sa Elizabeth Mall kakumbuya ang Pepsi Cola, Niña, Freego Jeans ug Netopia Internet Café alang sa paghatag ug pag-ila og pagtagad sa mga lokal nga talento sa natad sa pangmusika diha sa elementarya ug ingon man sa high school level.

Katluan ka mga banda ang unang mi-sign up alang sa maong kompetisyon. Apan gihashasan kini hangtod nga nahimo na lang kinse ka grupo.