Ice Breaker sa "I"

Pangandoy higayon sa kabatan-unan, inanay nga gihimu-an og lakang, karon hingpit nang naangkon ang mga bunga sa iyang mga gitanom. Kung pagahuna-hunaon, kaniadto ang pagka DJ usa lamang ka damgo. Karon sa iyang paghigmata iyang nakita ang iyang kaugalingon nga nagbuhat hisusama o labaw pa sa nahisulod sa iyang mga damgo niadtong milabay'ng panahon. Mao kini ang kasinatian ni DJ Robin Right diha sa gipalanog nga estasyonan sa kahanginan "93.9 I FM, Pwede!" sa programang "Ice Breaker ug "Baskog" matag 3:00-7:00 p.m.

Sa iyang mga kaugatan naglatay ang dugo sa usa ka magsisibya. Maong bisan kaniadto dili niya mapugngan ang iyang kaugalingon sa pagpalit ug paghangop sa mga butang nga adunay kalabutan sa radyo.

" Naa sa among dugo kay ang akong mama sa una dj man sad. Naa sad koy mga ig-agaw nga connected sad sa radio, 'nya hilig sad ko'g music." Pong pa niya sa dihang nakig-jamming sa Banat Hugyaw.

" Ang mga bata siguro karon o sa una, makakita siguro ka nga ang paliton nila mga duwaan, pero ako dili gyud ko makalimot sa naa na ko'y buot ba! Ang gisugod gyud nako'g palit kay plaka, mga elementary pa siguro ko ato. Kay atong higayona nipalit man sad akong papa og gwapo kaayo nga stereo," paghinumdom pa niya.

Usa sa mga album nga iyang gipalit kaniadto mao ang sa iyang idol nga si Jose Mari Chan. Maong sa dihang nahimo na siyang usa ka dj ug nahatagan og higayon nga makahinabi si Jose Mari Chan iya gyud dayong gisaysay kaniya ang iyang hilig sa kabatan-unan.

"Gitagaan ko og CD ni Jose Mari Chan kay pag-interview nako niya sa DYAC kaniadto ako mang gipakita niya ang album, 'this was the album that I bought when I was still very young, instead of buying toys, I bought an album and I bought your album'. Mao to nga lipay kay 'sya then after a few weeks iya kong gipadad-an og Jose Mari Chan album with signature."

Una mahisulod si DJ Robin Right sa "I FM" nagtrabaho na siyang daan sa ubay-ubay na pod nga estasyonan sa Radyo. Sa DYAP 88.3 siya unang nagsugod sa pagyawyaw sa kahanginan. Matud pa niya nga dili sayon ang iyang unang mga adlaw isip usa ka dj kay gawas nga nagbansay-bansay pa siya ug wala pa kaayo siya masuhito sa maong industriya, wala usab siya'y sweldo niadtong panahuna. Apan wala niya kini giisip nga usa ka babag sa pagkab-ot sa iyang mga damgo. Hinuon gihimo niya kini'ng usa sa mga ang-ang nga mogiya kaniya aron sa pagtung-tung sa kinatumyang bahin sa hagdanan- ang kalampusan.

Nahimo usab siyang parte kaniadto sa DYAC 90.7, Manila Broadcasting Company (MBC) 91.5 Yes FM, LS 97.1 Lupig sila ug daghan pa. Sa Yes FM siya gibunyagan sa pangalang "DJ Robin Right". Gani sa dihang gi-reformat ang Yes ngadto's 91.5 Hot gigamit gihapon niya ang maong pangalan ug hangtod karon wala na niya kini ilisi pa.

Gawas sa pagka dj, business minded usab si Robin Right. Sa tinuod lang aduna siya'y mga negosyo nga maoy iyang gigahinan sa iyang panahon.

"Nakatukod-tukod ko og mga ginagmay nga business. Sa akong pagtrabaho sa Shangrila ug Cebu Plaza, nakatigum-tigum gyud ko 'nya nakatukod ko og mobile sound system nga for rent pero indoor ra. Daghan na sad ko og mga gi-venture nga business oi! Like video games, 'nya karon naa sad koy business nga gihuna-hunaan pero ako pa sad lagi nga gistudyohan. In the process pa ni siya. Lain man gud ko'g prinsipyo sa kinabuhi. Gusto ko nga naa koy matabangan ba, naa koy mapatrabaho kay ingon ana gud na sa among pamilya. Like sa akong uncle sa akong papa." Saysay pa niya sa dihang nagkalawom na ang jamming.

Apan bisan man tuod og nindot ang iyang intention sa iyang isig ka tawo dili gyud malikayan nga adunay wala makauyon niini ug midaot kaniya maong sakit usab para kaniya kay bisan siya na ang ni- tabang siya pa hinuon ang gihimo nga dautan.

Samtang malipayon siya sa iyang nahimutangan sa pagkakaron, enjoy siya sa iyang kinabuhi isip usa ka dj kay aduna man siya'y kagawasan sa pagbuhat sa iyang mga mahuna-hunaan. Higayon sa iyang mga bakanting oras maka- atiman siya sa iyang mga ginagmay nga mga negosyo. Labaw sa tanan malipayon ang iyang inahan nga nagsud-ong kaniya.

Kung personalidad ang pagahisgutan dako ang kalahian sa character nga nailhan sa katawhan isip DJ Robin Right ug sa iyang tinuod nga pagka siya. Iyang gibutyag nga mas sabaan siya sa tinuod nga kalibutan. Samtang wala usab siya'y lipod-lipod nga mipadayag sa iyang mga panlantaw sa kabahin sa gugma. Gani iyang gisulti sa Banat Hugyaw ang iyang masulub-ong kasinatian sa gugma kaniadto nga para kaniya maoy usa sa mga hinungdan nganong naningkamot siya pag-ayo sa pagkakaron ug kung nganong dili na kaayo niya ihatag ang tanan niya'ng pagbati sa usa ka babae.

"When I was in college, naa koy nauyab nga layo kaayo ang among gap. Mubisita ko sa una nga bisiklita pa ang akong sakyanan pero iya auto (Corolla) lisod ka'y to nga time kay pobre ra ko. Ang feeling nako sa una, we're two worlds apart kay unsaon man nako pag-level nila nga naa ra man ko diri 'nya wala ganahi ang iyang parents nako. Sakit gyud kaayo, ang pinakasakit kanang in love ka pero dili gyud accepted, 'nya madala na lang sad ang girl sa family kay respito lagi 'nya bata pa sad. Dili man gud kinahanglan nga mo-fight ka nga ikaw ra usa, kinahanglan kamo gyu'ng duha." Pagpahungaw pa niya sa iyang gibati.

Samtang aminado siya nga daghan ang mga nangandoy sa iyang gilingkuran sa pagkakaron, maong ang iyang mensahe kanila nga higugmaon kung unsa man ang ilang pangandoy.