Bidlisiw sa Sug- buanong talento

Duha ka Sugbuanon ang mopabarug sa bandira sa nasud karong Sabado didto sa Shanghai Music Festival sa China. Mga Sugbuanon nga mga batan-on pa apan dili na bag-o kon kanta ug musical exposure ang hisgutan. Sila mao si Maria Donna nga lumad nga taga barangay Mambaling ug Jimmy Marquez nga garbo usab sa Toledo City. Gawas nga silang duha inanay na nga mikulit og kaugalingong ngalan sa natad sa musika sa Pilipinas, daan na nga managhigala isip mga gradwado sa kursong Mass Communication sa University of San Jose Recoletos ug parehong nahimong sakop sa naila na kaayo nga Dramatics and Cultural Ensemble sa maong unibersidad diin nagaling og maayo ang ilang mga talento.

Si Jimmy Marquez mahinumduman nga third placer sa Search for a Star in a Million sa ABS-CBN, samtang si Maria Donna ang singer sa sikat nga kantang "You Make It Happen."

Si Maria Donna nga nagbase dinhi sa Sugbo, mogikan karong adlawa alang sa prestihiyosong indigay karong Sabado didto sa China. Sa pakighinabi sa Banat Hugyaw, matud pa ni Maria Donna nga gikulbaan siya bisan pa man og anad na siya sa pagtungtong sa entablado. Apan matud pa niya sukad pa niadtong Agosto, human siya gipahibawo sa banggiitang si Vehnie Saturno (composer sa You Make it Happen) nga siya ang usa sa mga representatives sa nasud alang sa maong sangka, nagsugod na siya og bansay-bansay. Gani mipailawom man siya og special training ubos sa Center for Pop Music. Dugang niana wala usab siya modawat og gigs sa milabay nga mga buwan kay iyang gibubo ang iyang atensyon sa pagpangandam alang sa nahisgutan nga festival. Matud pa niya bisan gikulbaan siya apan feeling niya "being a representative sa whole country daug nang daan."

Duha ka orignal komposisyon ni Saturno, ang "Make Me Whole" ug "Only When Our Hearts Unite", ang kantahon ni Maria Donna sa maong music festival. Ug sa pangutana kung unsay x-factor niya nga posibleng makakawhat sa atensyon sa mga hurado, matud pa niya nga ihatag niya ang iyang "best" ug ang mga judges nay bahala sa iyang performance basta "proud" na siya nga gisaligan nga maoy mougbok sa bandira sa Pilipinas sa lain na usab nga international contest.

Ug sa pagbalik niya sa nasud, matud pa niya ilusad na usab niya ang iyang second album nga plano sa iyang producer nga I-release nationwide.