Wala kono'y professional jealousy

Layo ra kaayo ang gintang sa kaluhang Richard ug Raymond Gutierrez sa magsoong June Philippe Tar ug Chris Yan, apan dili nako malikayan usahay nga mahinumduman ang kaluha kon mahisgutan ug intrigahon usab usahay ang magsoong anak ni Pepe Tariman, ang creator, writer, director, ug editor pa gyod sa naila nang comedy series sa channel 47 [CCTN] nga nag-ulohan ug "Tres Metros" kay sama sa kaluha, moingon man sad ang duha ka anak ni Pepe Tariman nga, wa sad kono'y professional jealousy tali kanilang duha.

Mas iladong artista si Richard, samtang mas ilado sa natad sa hosting si Raymond. Si June Philipe Tar, mas ilado isip usa sa mga artista sa CCTN, ug nakaapil na sa "Dear Tatay," sa "Rosalinda" ug gikatakda nga maapil usab sa "Secret Angel" sa "Gugmang Dako'g Mata" [ni Marcos Navarro Sacol, ang creator sa daghan na kaayong mga character sa television sama nilang Teban ug Goliat sa "Si Goot da Wanderpol" ug Cosme, Salud, Petra ug Berting sa "Milyonaryong Mini"] ug uban pa samtang siya'y cameraman sa "Tres Metros" ug usa sa mga goons niini. Lead vocalist pa sa banda nga Streetwalker nga kadaghan na modaog sa mga band competitions sama sa dili pa lang dugayng bangga didto sa Fatima, Jubay, Liloan, human usab siya miapil sa malampusong Variety Show sa mao gihapong lugar tolo ka gabii sa wa pa ang bangga sa banda.

Sa laing bahin, si Chris Yan, mas gihatagan og pagtagad ang pagtuon diin, usa sa student leaders sa Regino Mercado Night High School, ug mosalga lang sa shooting kon bakasyon, apan aktibo sa mga fashion shows human siya mapiling Mr. Regino Mercado 2003. Aktibo usab siya sa basketball. Gani, human sa graduation karong Marso, manimpalad pod kono siya sa pag-try out sa UV Lancers, pamasin nga mahimo siya, ug dili na kinahanglang magbayad sa iyang pagtungha.