Pagsidlak sa bitoon ni Edison

Usa ka kanhi simple lang nga bata kinsa mahiligon sa pag-awit apan wala damha nga usa na siya sa misidlak nga bition karon sa natad sa musika. Ang pagkamahiligon ni Edison Monternel sa pagkanta ang nagdala kaniya sa iyang nakawhat karong kalampusan. Siya naggikan sa pamilyang mahiligon sa pag-awit ug ikaduha sa upat nga anak sa magtiayong Fred ug Luzviminda. Ang mga ginikanan ni Edison ang nag-agak kaniya nga mosulod sa kalibutan nga iyang nahimutangan karon tungod kay nasuta nila ang iyang talagsaong talento. Si Edison, 24-anyos ug lumad nga taga 98 street barangay Lorega niining dakbayan.

Si Edison maoy palarang grand champion 2004 sa "Calma Special Search for a Recording Artist" diin ang maong bangga gipahigayon diha sa Elizabeth mall niining dakbayan. Giangkon ni Edison sa Banat Hugyaw nga wala niya damha ang maong kalampusan tungod kay puro banggiitan sa natad sa awit ang iyang mga nakasangka niadtong panahona. Isip bunga sa iyang kadaugan aduna na siya karoy self-titled album ubos sa "Legends & Gems Records" nga mapalit sa mga nagkadaiyang recording bars sa syudad. Ang maong album adunay walo ka kanta diin ang respetadong si Doy Montana maoy composer.

Giasoy niya sa Banat Hugyaw nga 15-anyos siya dihang nagsugod sa iyang singing career diin miapil siya og mga bangga sa awit sa mga barangay ug mga estasyonan sa radio. Giangkon ni Edison nga sa matag bangga sa awit nga iyang salmotan dili sa tanan higayon siya ang nagmadaugon apan ang maong mga kapildihan ang gihimo niyang sumbanan sa iyang kalamposan karon ug ang tanang pagtamay nga iyang nadawat gipalapos lang niya sa iyang pikas dunggan.

Niadtong 2002 siya maoy napiling grand champion sa DYLA "Big Showtime" grandfinals ug sa tuig 2004 napili usab siyang grand champion sa "The Rhythm of the New Generation" sa Gaisano Metro.

"Dili sa tanang contest nga mauyonan ka sa mga hurado bisan og maayo ka og tingog kay basin aduna pa gyuy kuwang sa imong pag-perform, apan ang akong kapildihan akong gidawat tungod kay ang usa ka tinood nga singer kahibawo nga modawat sa kapildihan ug ang importante sa tanan kanunay ka nga mapa-ubsanon" paambit ni Edison. Gani ang mensahe niya alang niadtong mga nangandoy nga maghari diha sa kalibutan sa musika mao nga "kinahanglang kanunay'ng magpaubos dili manghambog nga ikaw na ang labing maayo sa tanan para magmalampuson".

Mitapos og Associate degree sa Hotel and Restaurant Management sa University of Cebu si Edison apan posible nga dili na niya kini magamit sanglit naglaraw siya nga molangyaw sa laing nasud aron adto ipadayon ang iyang talento sa pag-awit. Ikaduha gusto usab niyang ipaambit sa uban ang iyang talento pinaagi sa pagtudlo sa mga tawo nga mahiligon sa pag-awit nga gusto makakat-on kung unsaon nila sa paggamit ang ilang talagsaong talento.

Nasayran sa Banat Hugyaw nga paboritong kantahon ni Edison ang mga standard songs ug OPM tungod kay haom kaayo ang maong mga awit sa iyang tibook nga tingog. Samtang ang "My Love Will See You Through" ni Marco Sison ang kanunay gayud niyang awiton tungod kay ganahan siya sa lyrics sa maong kanta nga kabahin sa gugma. Usa siya karon sa mga regular performers matag Biyernes sa Search for Recording Artist diha sa Gaisano Main.

Sa wala pa mahimong recording artist si Edison kanhi nagtrabaho usab siya isip food attendant sa pipila ka restaurants niining dakbayan. Sa katapusan gihulagway niya ang iyang kaugalingon nga, "mauwawon, mahigalaon ug kusog nga mopakatawa sa iyang mga higala" ug lakbit pa niya dali usab siyang ma-in love, dayon miagik-ik.