Kadaugan luyo sa kaparotan

"It was the best thing that happened to me. I was able to fulfill one of my dreams and I could not ask for more," mao kini ang pamahayag ni Binibining Pilipinas-World Anna Maris Igpit sa iyang text message ngadto sa Banat-Hugyaw sa iyang pag-abot didto sa Manila gikan sa Warsaw, Poland niadtong miaging semana, Lunes, Oktubre 2.

Walay rason nga kadudahan ang sinsero kaayong pulong ni Anna kay sa paghiabot gyud niya sa Miss World pageant didto sa Warsaw, Poland, iya gyud gisulod sa iyang alimpatakan ug kondisyon kaayo niyang gihuna-huna nga 'God's will be done' ug iya gyud gibuhat ang tanan niyang mahimo para sa maong indigay, preparado pa gyud siya kung unsa dyud ang mahitabo.

Sa pagka-tinuod lang, sa unang mga adlaw niyang pakig-'compete' didto sa Warsaw, Poland, daghan kaayong mga 'observants' nga wala makauyon sa pag-retoke sa iyang nawong ug pag-arte sa iyang buhok, ug gipangutana siya sa Banat-Hugyaw kung unsa iyang komentaryo mahitungod niini apan nagdumili siya sa pag-ingon nga dili na lang hisgutan pa ang maong isyu.

Si Anna napakyas sa pag-angkon sa korona sa Miss World para unta sa Pilipinas nga wala pa dyud makuha sukad masukad, pero naa pa dyuy dako ug labing maayo nga moabot sa iyang kinabuhi nga para gyud niya ug gani nag-pangedaron pa siya og 19 anyos busa taas pa kaayong panahon nga mo-uswag ang iyang career. Matud ni Anna ang kasinatian niya sa Miss World maoy labing nindot ug malipayon nga gutlo sa tibuok niyang kinabuhi. Malipayon siya nga nakig-uban sa sobra sa usa ka gatos nga mga babayeng langyaw sa tibuok kalibutan nga lain-lain og kultura ug lenggwahe. Ang iyang paboritong kahigayonan kadtong didto sila sa lugar sa Gizycko diin didto gipahigayon ang 'sports events'. Didto sad sila nagsakay og gagmay sakayan sa lawa ug nagwara-wara sa mga tawo nga nagdala og mga flaglets. Ug usa siya sa napilian sa Miss World Organization kauban si Miss Poland ug Miss Canada nga makighinabi sa mga tawo sa pinulongang Polish.

Malipayon si Anna nga daghan siyang nakat-onan ug bukas siya sa mga tawo sa iyang palibot nga lain-laing personalidad ug 'backgrounds'. Nakat-on pud siya ug naka-realize kong unsa siya ka-swerte didto nga nag-representar sa nasud. Matud pa niya: 'I am a winner already," paniguro niya. Ang iyang suod nga mga higala didto mao sila si Miss Mongolia, Miss Korea, Miss HongKong, Miss Indonesia pero ang labing suod niya mao si Miss Singapore ug Miss Sri Lanka ilabi na kay tungod kamao sila mosulti og pinulongang iningles. Permi ug sige sila magkuyog sa tanang mga aktibidades sa maong kompetisyon. Kanunay usab nga gihuna-huna ni Anna atong higayona nga silang tanan pulos mga palarang nakadaog sa kada nasud ug may tsansang makaangkon sa korona ug ang maayong butang nga iyang naangkon mao nga malipayon siya didto sa Miss World. Matud pa ni Anna nga always siya mag-ampo og nine-day novena sa Our Lady of Perpetual Help ug St. Therese of the Child Jesus ug mag-rosaryo kada gabii bisan sa iyang kakapoy sa mga aktibidades sa Miss World. Pirme sad siya mangaliya ngadto sa Ginoo nga lamdagan siya pinaagi sa Espirito Santo ug tagaan siya og kalig-on kay open siya nga modawat kung unsay resulta inig human sa maong kompetisyon. Busa paghuman og anunsiyo sa semi-finalists sa maong kompetisyon, igo na lang siya nipahiyom ug gidawat ang tanan.

Matud niini bukas siya nga mag-artista ug gani karon pa lang daghan na siyag offer alang sa commercial endorsements ug hosting stints sa TV apan miingon siya nga iya unang timbang timbangon daan unsay labing maayo alang kaniya. Sa pagkakaron maoy naglabi sa hunahuna ni Anna nga ipadayon ang iyang pagtuon sa Southwestern University pinaagi sa home study program aron maka-estar siya sa Manila ug mag-alagad sa Binibining Pilipinas Charities Incorporated.