Angel gihagit ni Robin

Human sa Till I Met You, ang musunod nga project niya sa GMA-7 maoy priority karon ni Robin Padilla diin duna kini working title nga "Asian Treasures" ug si Angel Locsin ang iyang kauban. Gitug-an ni Robin ngadto sa PangMasa nga wala pa siya makakita ni Angel sa personal ug sa unang higayon nga maghimamat unya sila hatagan niya og gloves ang young actress.

Kini tungod kay matud pa ni Robin, daghan na ang nakasulti niya nga "fighter" gayud si Angel sama sa gipakita niini sa iyang mga nakalabay nga tulo ka telefantasiya.

Matud ni Robin nga kon mobalibad si Angel sa iyang regalo nga gloves nagpasabot kini nga dili tinood ang mga gipakita ni Angel ilabi na kadtong namulong ang dalaga "ano ang panama ni Robin sa ginawa ko, sa usa ka episode sa Extra Challenge diin dunay blasting scenes ang dalaga.

Hosts sa S-Files balik na

Gipaabot nga daghan ang mag-atang sa S-Files karong hapon sanglit nahibalik na ang mga co-hosts ni Pia Guanio nga sila si Richard Gomez ug Joey Marquez gikan sa ilang Asian Cruise para sa month-long anniversary presentation sa "Lagot Ka, Isusumbong Kita."

Nasayran sa PangMasa nga nahibalik na usab si Paolo Bediones gikan sa States. Apan subling makita si Manay Lolit Solis sa special interview niya nila ni Vic Sotto ug Pia Guanio human usab nagbahad ang beteranang kolumnista sa PangMasa nga dili niya lum-an ang mga nahisgutan hangtud nga dili sila moangkon sa tinood nga estado sa ilang relasyon.

Duna nay mga nagsuwat kalabot sa maong interview ni Manay Lolit apan gipaneguro sa S-Files nga mas daghan pa ang detalye nga angay mahibaw-an gikan sa maong exclusive nga didto gihimo sa set sa "Enteng Kabisote 3" sa Antipolo City.

Sexbomb Dancers mamauli na

Kataw-anan ang kasinatian sa Sex Bomb Dancers nga atua karon sa Japan alang sa taping sa bag-ong season sa "Daisy Siete". Tsika pa nga nag-CR ra sila si Mia, Yvette ug IC apan paggawas nila diha nay mga polis nga nagpaabot nila ug diretso silang gidala sa presinto.

Feeling sa pulis nga mga illegal alien sila tungod kay dihang gipangayuan og passport wala silay nahatag sanglit ang ilang manager nga si Joy Cancio maoy naghupot niini.

Hinuon gibalita sa Startalk kagahapon nga nasulbad na ang tanan human nila ipasabot ngadto sa mga otoridad nga kasamtangan silang nag-shooting didto alang sa usa ka TV show sa Pilipinas.

Gipaabot nga mahibalik na dinhi sa nasud ang Sexbomb Dancers sunod semana. Gigastuhan gyud og maayo sa Focus E ang maong season aron lamang mas kumbinsido ang ilang mga eksena sanglit Pinay entertainers ang role sa Sexbomb dancers sa umaabot nga episode sa "Daisy Siete".